Повеќемина Македонци што живеат и работат во Германија велат дека воопшто немаше да биде проблем доколку во брошурата пишуваше
педантно дека туристичката тура се организира од Република Албанија, бидејќи, навистина, тоа е факт. Но проблемот е што во брошурата
флагрантно се манифестираат територијални претензии со тоа што е претставено дека туристичката тура се реализира во албанскиот дел на Охридско Езеро, при што се рекламира со фотографија што илустрира значаен објект од Македонија, а се тврди дека тоа е Албанија…
Незнаење, провокација или флагрантно манифестирање претензии
Повеќемина македонски иселеници во Германија, повеќето од нив читатели на „Нова Македонија“, деновиве реагираа на брошура од германски супермаркет во која се нуди туристичко патување низ Република Албанија во 2024 година, но на фотографијата е претставена црквата „Свети Јован Богослов Канео“ – еден од најпознатите православни храмови во Охрид, на карпестиот рид над плажата Канео во стариот дел на градот Охрид, Македонија. Конкретно станува збор за рекламен материјал од „Нето маркет“ во градот Мајнбург, како додаток за брошура од споменатиот маркет, а се однесува на туристичко патување во организација на туристичката агенција „Бигекстра туристик ГмБх“ (BigXtra Touristik GmBh), со седиште во Минхен.
Нашинците во Германија со кои разговаравме велат дека ова не е прв ваков случај, слична ситуација имало и пред неколку години, кога револтирани Македонци се обратиле до одредена туристичка агенцијата за слична спорна фотографија, по што била отстранета од веб-страницата на агенцијата.
За сегашната спорна брошура повеќемина Македонци што живеат и работат во Германија велат дека не е проблем што пишува Албанија во брошурата, бидејќи туристичката тура е во Република Албанија и можеби гостите ги водат во албанскиот дел на Охридско Езеро, но не е во ред да се рекламира со фотографија што илустрира значаен објект од Македонија, а се тврди дека тоа е Албанија.
Според информациите што ги добивме од Македонците што живеат во германскиот градот Мајнбург, во спорната брошура било напишано дека турата ќе трае осум дена, а само половина ден е планиран за посета на градот Охрид. Некои од револтираните Македонци директно се јавиле во туристичката агенција со образложени дека не во ред да се нуди туристичко патување низ Албанија, а притоа рекламниот материјал да се илустрира со црквата „Свети Јован Богослов Канео“ во Охрид, Македонија, и да се вели дека тоа е Албанија, без да се спомене дека ќе биде посетена таа црква во Македонија.
Во директна комуникација со претставник на туристичката агенција што е организатор на патувањето им било кажано дека во Охрид живеат многу Албанци, воопшто не ја споменале Македонија и дека аранжманот се однесува на Република Албанија.
Благодарение на реакцијата на македонските иселеници во Германија, спорната брошура била повлечена од германскиот маркет, а туристичката агенција од својата веб-страницата ја отстранила фотографијата на црквата „Свети Јован Богослов Канео“.
– Единствено позитивно е што ова е Германија и кога јас лично се јавив во „Нето рајзен“ веднаш реагираа и ја изменија понудата – вели нашиот соговорник.
Македонските иселеници во Германија велат дека за оваа ситуација треба да реагираат македонските државни институции, бидејќи станува збор за лажна информација, а на ова прашање треба да обрнат внимание и македонските туристички агенции.
Македонските здруженија и организации во Германија подготвуваат опомена бидејќи ова е погрешно рекламирање што не е дозволено во Германија и предизвикува заблуда кај пошироката германска јавност.
Д.Ст.
