Хуманитарната помош за Газа која пристигна од неколку земји се акумулираше денеска во голем куп во египетскиот Синај, кој се граничи со областа под израелска опсада, но сепак не стигна до палестинската територија, изјавија очевидци за „Франс прес“. По три израелски напади за помалку од 24 часа во понеделникот и вторникот врз палестинската област Рафах, затворен е граничниот премин кон Египет.
Палестинскиот претседател Махмуд Абас ја истакна итната потреба веднаш да се обезбедат коридори за хуманитарна помош за Газа. Вчера американски официјален претставник изјави за АФП дека Египет и Израел се договориле да им дозволат на Американците да го напуштат Појасот Газа преку Рафах. Но, Египет ги постави условите.
– Се негира дека граничниот премин е исклучиво за минување на странци. Позицијата на Египет е јасна: условот поставен за минување на Американците е да се олесни испораката на помош за Газа – велат високи извори на кои се повикуваат медиумите блиски до разузнавачките служби.
Израел вели дека ништо не може да влезе преку Рафах без негова координација. Денеска, очевидци рекоа дека бетонските блокови што Египќаните ги поставија по израелското бомбардирање за да ја зајакнат нивната граница се уште се таму, што укажува дека во овој момент не е планиран премин.
Пратка со помош од Јордан, Турција и Обединетите Арапски Емирати, како и медицинска опрема за потребите на 300.000 луѓе во Појасот Газа, испратена од Светската здравствена организација (СЗО), веќе пристигна на аеродромот Ел Арих, главниот град на северен Синај.
Египет испрати конвој составен од околу сто камиони со 1.000 тони хуманитарна помош.
Израел, кој ги контролира преостанатите врски на Газа со остатокот од светот, прогласи „тотална опсада“ по 16 години блокада, забранувајќи ја храната и го прекина снабдувањето со вода и електрична енергија за 2,4 милиони жители на палестинската територија.
Ова го зголемува притисокот врз Египет, кој стравува дека неговата граница ќе биде пробиена од жителите на Газа, што се случи во 2008 година на почетокот на израелската блокада. Израелската армија во петокот нареди 1,1 милион жители на северниот дел на Појасот Газа да се преселат на југ, кој граничи со Египет.
Египетските безбедносни извори изјавија дека Каиро нема намера да прифати таков масовен прилив на бегалци.
