Брзата изградба на дигитална инфраструктура во првата половина на 2023 година силно го динамизира кинескиот економски и општествени развој
Бројот на корисници на интернет заклучно со јуни 2023 година забележа пораст од 11,09 милиони во споредба со декември 2022 година, според извештајот за развојот на интернетот во Кина на Информативниот центар за интернет-мрежа на Кина (ЦННИЦ)
Според новиот официјален извештај на Информативниот центар за интернет-мрежа на Кина (ЦННИЦ), вкупниот број корисници на интернет во Кина достигна 1,079 милијарда, при што користењето на дигиталните услуги се зголеми на 76 отсто. Информатичарите велат дека кинеската дигитална инфраструктура, особено генеративната вештачка интелигенција, во голема мера го зајакнува економскиот и општествениот развој на земјата.
Бројот на корисници на интернет заклучно со јуни 2023 година забележа пораст од 11,09 милиони во споредба со декември 2022 година, според извештајот за развојот на интернетот во Кина на Информативниот центар за интернет-мрежа на Кина (ЦННИЦ). Исто така, вкупно 2,937 милиони базни станици за 5Г се изградени и пуштени во употреба. Извештајот покажа дека речиси сите кинески корисници на Интернет се корисници на видеоматеријали, при што бројот на мрежни видеокорисници достигна 1,044 милијарда, што претставува зголемување од 13,8 милиони во однос на декември 2022 година. Околу 82 отсто од нето-корисниците купуваат преку интернет, а бројот достигнува 884 милиони, што е зголемување за 38,8 милиони во однос на декември 2022 година, според извештајот.
Интернет и во руралните средини
Информатичарите изјавуваат дека фактот дека користењето интернет во Кина е зголемено на 76 отсто покажува дека дигиталната инфраструктура на земјата влезе во фаза на брз развој и веројатно ќе продолжи да расте со брзо темпо. Некои од нив се уверени во тоа дека промовирањето на користењето интернет во руралните села во Кина може да понуди нова точка на раст и одржлив развој. Со организирање настани како што е Руралната кошаркарска асоцијација, окрузите во југозападната кинеска провинција Гуиџоу даваат пример за кинеските рурални области за тоа како да ги користат зрелата кинеска инфраструктура и мрежите на социјалните медиуми за да се поврзат со надворешниот свет, што исто така може да генерира огромни економски придобивки.
Јакнење на дигиталната економија
Мао Ли, заменик-претседател на Кинеската асоцијација за Интернет, смета дека во контекст на постепеното економско закрепнување во првата половина од годината, дигиталната економија стана важен мотор за стабилен раст. Во извештајот се наведува дека од крајот на пандемијата, кинеските дигитални компании, како што се онлајн трговците на мало, услугите за превоз и онлајн туристичките фирми, ги искористиле поволните пазарни услови и консолидирале силна развојна динамика. Од јуни, корисничката база за онлајн купување, услуги за превоз и резервации за патувања преку Интернет во Кина се зголеми за над 30 милиони луѓе, во споредба со податоците за декември 2022 година. Во првата половина од годината националните онлајн продажби на мало достигнаа 7,16 илјади милијарди јуани, што е за 13,1 отсто повеќе од годишно ниво, при што продажбата на мало преку Интернет во руралните средини изнесува 1,12 илјада милијарди јуани, се наведува во извештајот на ЦННИЦ.
Ширење на 5Г-мрежата
Во извештајот се истакнува дека заклучно со јуни, Кина изградила и пуштила во функција вкупно 2.937 милиони базни станици за 5Г, со 676 милиони корисници на мобилни телефони со 5Г-технологија. Апликациите за 5Г исто така се интегрирани во 60 главни економски сектори, забрзувајќи го нивното проширување во клучни области, како што се здравството, образованието и транспортот. Џанг Хуи, продекан на Факултетот за економија на Универзитетот во Пекинг, изјави за „Глобал тајмс“ дека брзата изградба на дигитална инфраструктура во првата половина на 2023 година помага да се забрза економскиот и општествениот развој.
Покрај тоа, во извештајот на ЦННИЦ се наведува дека акумулираниот мобилен сообраќај на интернет достигна 142,3 милијарди гигабајти, што е за 14,6 отсто повеќе од една година. Апликациите за мобилен интернет сè повеќе се користат, со испитани вкупно 2,6 милиони активни апликации на домашниот пазар, што дополнително ги покрива секојдневните потреби за учење, работа и начин на живот на корисниците на интернет.
