Повеќе од 100.000 мигранти го преминаа Ла Манш со чамци од Франција до југоисточна Англија откако Велика Британија почна јавно да ги евидентира пристигнувањата во 2018 година, покажуваат официјалните бројки.
Речиси 755 мигранти се откриени во четвртокот во 14 мали чамци кои се упатиле кон јужниот брег на Англија, покажа статистиката на британското Министерство за внатрешни работи. Ова е најголемиот број на мигранти во еден ден годинава, пренесе „Фена“.
Овие премини го зголемуваат бројот на пристигнувања досега оваа година на речиси 16.000, со што вкупниот број од 2018 година достигна 100.715.
Конечниот број за 2023 година се чини дека ќе биде помал од претходната година, за прв пат откако рутата почна да расте во популарност на крајот на минатата деценија.
Само 299 мигранти патувале во 2018 година, но овој број се зголемил на 8.466 во 2020 година, додека минатата година биле забележани рекордни 45.755 пристигнувања.
Помалите бројки во 2023 година би можеле да се должат на неколкумесечните особено лоши временски услови, што го прави речиси невозможно патувањето со мали гумени чамци.
Француските власти, исто така, ги засилија патролите и другите мерки за одвраќање, откако Лондон во март се согласи да му испраќа на Париз стотици милиони евра годишно за напорите.
Трасата низ една од најпрометните бродски ленти во светот постојано се покажа опасна, со неколку превртувања и десетици мигранти кои се удавија во нејзините води во текот на изминатата деценија, пренесе „АФП“.
