Реномираната глобална инвестициска банка од Холандија, ИНГ, во своја анализа со препорака централните банки да запрат со кревањето на каматните стапки
Ако сме во право, централните банкари ќе се приспособат на новата реалност во последните месеци од годината, признавајќи послаб раст, поширока дезинфлација и дека нема потреба од понатамошни зголемувања на каматните стапки, се вели во анализата на ИНГ
Реномираната ИНГ, глобална инвестициска банка од Холандија, во својата најнова анализа деновиве дава еден генерален заклучок дека „до крајот на оваа година се очекува понатамошно слабеење на глобалната економија“! Второ, дека „основната инфлација ќе се повлече побрзо отколку што сметаат централните банки“. И трето, дека „намалувањето на каматните стапките ќе се случува во наредната 2024 година, но не и во тековнава 2023 година“!
Во анализата на глобална инвестициска банка од Холандија се вели дека светската економија дополнително ќе забави. Од друга страна, кинеската економија ќе покаже резистентност, но и натаму ќе има потешкотии, додека американската економија со прогноза на висока веројатност ќе доживее зимска рецесија. Што се однесува до еврозоната, таа ќе остане во зоната помеѓу стагнација и рецесија.
Централните банки едноставно, со сегашните политики, ја саботираат економијата
– Очекуваме Федералните резерви да започнат со намалување на стапките во првиот квартал на 2024 година, а Европската централна банка и Банката на Англија веднаш потоа – стои во анализата на ИНГ во врска со работата на главните национални банки за првата половина од 2023 г.
Имено, нивната сугестија е дека „сè додека централните банкари не сфатат дека сме во перманентно и долгорочно економско забавување“, централните банкари ќе продолжат да ги зголемуваат стапките, а не да ги намалуваат.
– Ако сме во право, централните банкари ќе се приспособат на новата реалност во последните месеци од годината, признавајќи послаб раст, поширока дезинфлација и дека нема потреба од понатамошни зголемувања на стапките – се вели во анализата на ИНГ.
За издвојување се коментарите на претставниците на американските Федерални резерви, кои укажуваат дека иако е постигнат напредок, има уште работа да се заврши за да се врати инфлацијата на целта. Одлуката за промена во јуни беше само забавување на темпото на зголемувања, при што ФЕД сигнализираше дека гледа потреба од нови две дополнителни зголемувања на каматните стапки за 25 процентни поени пред крајот на годината.
– Зголемувањето на стапката во јули изгледа практично сигурно со оглед на тоа што инфлацијата е над целта и пазарот на работни места останува тесен, но не сме убедени дека банката ќе продолжи со второто зголемување, сметаат од ИНГ. Банката на федерални резерви признава дека инфлацијата на цените на стоките е под контрола и дека трошоците за домување брзо ќе се забават во втората половина на 2023 година, но креаторите на политиката се фокусирани на основните услуги, со исклучок на домувањето.
Европската централна банка (ЕЦБ) и натаму ќе ги зголемува каматните стапки
Реномираната глобална инвестициска банка од Холандија ИНГ во својата анализа истакнува дека „и покрај слабеењето на изгледите за раст и падот на вкупната инфлација, Европската централна банка (ЕЦБ) не сака да ризикува. ЕЦБ „мора да биде сигурна дека го убила ’змејот на инфлацијата‘ пред да размисли за промена на политиката. Ова е причината зошто таа става поголем акцент на вистинските движења на инфлацијата и зошто помалку ќе се потпира на прогнозите отколку во минатото. Ова е голем ризик бидејќи сè уште мислиме дека ЕЦБ е премногу оптимист за изгледите за раст на еврозоната. Историските докази сугерираат дека базичната инфлација вообичаено заостанува со вкупната инфлација додека инфлацијата на услугите заостанува онаа на стоките. Наспроти оваа заднина, натамошните зголемувања на стапките го зголемуваат ризикот од позначајно забавување на економијата понатаму“.
– Доколку економијата остане слаба, процесот на дезинфлација добива на интензитет и базичната инфлација почнува да опаѓа по летото, циклусот за кревање каматни стапки на ЕЦБ треба да заврши со состанокот во септември, иако Банката може да почека до состанокот во декември за официјално да го прогласи за завршено – се истакнува во анализата на ИНГ.
Потребна е поголема флексибилност на централните банки
Централните банкари се премногу фиксирани на целите за инфлација од 2 отсто. Таквата прецизност не е корисна во економски систем, кој е подложен на низа заклучувања инспирирани од пандемијата проследени со немилосрдни монетарни и фискални стимулации. Инфлаторните импулси почнуваат да излегуваат од системот, па затоа е потребна поголема флексибилност. И има преседан: Банката на федерални резерви усвои флексибилно просечно насочување на инфлацијата во 2020 година, но ја намали кога се појави пандемијата.
– Ако единствената алатка ви е чекан, секој проблем изгледа како шајка – се вели во едиторијалот на „Блумберг“ на истава тема. Централните банки имаат должност да се грижат да обезбедат најсиромашните во општеството да не страдаат несразмерно од рецесија што целосно може да се избегне. Е.Р.
