Портпаролката на руското министерство за надворешни работи, Марија Захарова, изјави дека Москва би можела да ѝ врати на цела Европска Унија поради протерувањето на 70-те руски дипломати.
Политизираната одлука на Софија за неоправдано намалување на нашиот дипломатски персонал во Бугарија сигурно нема да помине без билатерален одговор – посочи Захарова.
Таа ги повика Софија и ЕУ „да размислат за принципот на реципроцитет што е основа на дипломатските односи“.
Европската дипломатија треба да разбере дека непромислената поддршка на антируските акции од различни земји-членки ја принудува ЕУ да преземе одговорност за последиците, вклучувајќи и кога станува збор за одмазднички мерки од наша страна – наведе Захарова.
Претходно, шефот на руската дипломатија Сергеј Лавров изјави дека одлуката на Бугарија да протера 70 руски дипломати е резултат на притисокот на Вашингтон врз Софија. Тој оцени дека желбата на „американскиот суверен е да го убие историското паметење не само на Бугарите туку и на другите народи на Балканот, пред сѐ на православните“.
Шефот на руската дипломатија објасни дека „желбите на суверенот“ вклучуваат убивање на историската меморија на Бугарите, уништување на темелите на односите воспоставени во заедничката борба за независност и многу други ситуации, вклучувајќи ги и оние од поновата историја.
Седумдесет вработени во руските дипломатски претставништва пред три дена ја напуштија Бугарија поради обвинувања за шпионажа. Со нив заминаа и нивните семејства, а вкупниот број луѓе што ја напуштија земјата изнесува околу 200. Тоа е досега најголем број протерани дипломати од Бугарија, членка на ЕУ и на НАТО, но традиционално блиска до Русија.
ЕУ го изрази своето жалење за „неоправданата закана на Русија да ги прекине дипломатските врски со Бугарија“.
Голем број европски земји протераа руски дипломати по почетокот на руската инвазија на Украина на 24 февруари, а Москва возврати со слични мерки.
