Општина Центар одбележа 70 години од раѓањето на македонскиот литературен деец и еден од најпознатите дебармаалци, Горан Стефановски. По тој повод, на дел од фасадата на ООУ „Коле Неделковски“ е насликан мурал со ликот на Стефановски, а во паркчето спроти општинските бараки се одржа краток пригоден театарски перформанс.
– Новиот мурал на Стефановски, изработен од уметникот Блаже Атанасков, кој ќе го краси неговото и наше Дебар Маало е еден мој личен симболичен гест, чија изведба му оддава почит на еден од најголемите и најпознати центарци – рече градоначалникот на центар Горан Герасимовски.
Одбележувањето на роденденот се затвори во малиот парк спроти општинските бараки, каде што група автори, Васил Христов, Викторија Рангелова-Петровска, Русе Арсов, Ивана Павлаковиќ, Никола Настоски и Исмет Шабанович, го изведоа театарскиот перформанс со делови од драмите на Стефановски, наречен „Маалски драмски разговори“.
Во овој парк, пред три години, Општина Центар, заедно со семејството на Стефановски и Здружението на граѓани за зачувување и промоција на културното наследство на Горан Стефановски, засади чинар и подоцна го постави спомен-обележјето со клупата на Горан. Оттогаш, секоја година Општината симболично го одбележува 27 април, роденденот на еден од најпознатите центарци, Горан Стефановски.
Стефановски е роден на 27 април 1952 година, во Битола, каде што неговиот татко и мајка, режисер и глумица, работеле во тој период. Стефановски, разбирливо, најголемиот дел од детството го поминува во театрите, додека неговиот помлад брат Влатко се пренасочува кон музиката.
– Семејството Стефановски води потекло токму од Дебар Маало, со кое и самиот тој беше емотивно поврзан и каде што по сите претстави, патувања и гостувања, секогаш се враќаше. Дебар Маало е нераскинлив дел и од неговото литературно творештво. За значењето на Горан не треба да се трошат дополнителни зборови. „Диво месо“, „Дупло дно“, „Лет во место“, „Тетовирани души“, „Демонот од Дебар Маало“… се само дел од капиталните дела, не само на Стефановски туку и на цела современа македонска драматургија – изјави Герасимовски.
Добитник е на многу домашни и меѓународни награди за неговото творештво и достигнувања, меѓу кои и државната награда за животно дело во областа на науката, културата и уметноста „11 Октомври“. Горан Стефановски до денес е присутен во нашето културолошко секојдневие – книгите и расказите ги читаме и сега, а неговите драми сè уште се играат и во домашните, но и во театрите низ Европа.
