Воените власти на Мјанмар ослободија 628 лица уапсени за време на протестите против пучот минатиот месец, објави денеска државната телевизија.
Очевидци пред затворот Исеин во Јангон изјавиле дека виделе автобуси полни со млади луѓе кои изгледале среќни.
АП јавува дека бил ослободен и новинарот на таа агенција, бидејќи претходно бил уапсен затоа што ги снимал протестите.
Стотици студенти беа уапсени на почетокот на март, бидејќи демонстрираа против воениот удар, во кој беше соборена избраната влада на премиерот Аунг Сан Су Чи.
Активистите на Мјанмар планираат протести против пучот и тивок протест по смртта на седумгодишното девојче убиено во нејзиниот дом во Мандалај, објавија агенциите во средата кога судењето на соборената лидерка Аунг Сан Су Чи повторно беше одложено.
Семејството Хин Мио Чит за „Би-би-си“ изјави дека полицијата го убила девојчето додека трчало кон нејзиниот татко за време на рацијата во нивниот дом во градот Мандалај.
Демократските демонстранти палеа свеќи преку ноќ откако персоналот на погребалната служба во Мандалај соопшти дека седумгодишното девојче починало од раните од куршум. Таа е најмладата жртва на крвавото спротивставување на пучот, кој започна на 1 февруари.
Војниците пукале во нејзиниот татко, но погодиле девојче што седело во неговиот скут во нивната куќа, изјави нејзината сестра за „Мјанмар сега“. Исто така во областа се убиени и двајца мажи.
Војската немаше директен коментар за инцидентот, но ја зајакнува употребата на сила како што продолжуваат протестите.
Организацијата за заштита на децата „Спаси ги децата“ објави дека повеќе од 20 деца има меѓу десетиците убиени лица.
