Секое шесто дете во Шпанија се чувствува депресивно за време на епидемијата на коронавирус, при што повеќе погодени се оние од посиромашните семејства, објави хуманитарната организација „Спасете ги децата“ (Save the Children).
Шпанија воведе еден од најстрогите карантини во светот, вклучувајќи го и фактот дека децата веќе четири недели не беа во можност да ги напуштат своите домови поради вирусот од кој починаа речиси 28.000 луѓе.
Организацијата соопшти дека истражувањето во април открило дека и покрај тоа што семејствата поминуваат повеќе време заедно, 17 проценти од децата се чувствуваат депресивно и дека карантинот ги истакнува економските нееднаквости.
Во повеќето сиромашни семејства, 32,3 проценти од децата имаат потешкотии во спиењето, а 30,1 процент стравуваат од ковид-19, скоро третина повеќе отколку во побогатите семејства. Посиромашните деца, исто така, почесто плачат, покажа студија заснована на повеќе од 1.800 интервјуа со деца и нивните семејства.
Од организацијата велат дека секое четврто ранливо семејство доживеало загуба на работното место или пад на приходите, што предизвикало децата да се чувствуваат напнато и несигурно. Во некои случаи, семејствата морале да делат дом со странци за да ги намалат трошоците за изнајмување стан.
– Да се биде изолиран во мали станови со луѓе кои не се дел од семејството е ризично затоа што тие семејства се изложени на двоен стрес. Тие ги загубија своите работни места затоа што не можеа да работат и беа изолирани на многу мали простори – рече Андрес Конде, шеф на шпанскиот огранок „Спасете ги децата“ во Шпанија.
Здружението ги повика властите да им помогнат на сиромашните семејства да ги покријат основните трошоци за живот. Шпанската влада во неколку наврати вети дека нема да остави никого на цедило и дека ќе ја финансира минималната плата за околу еден милион најсиромашни домаќинства.
