Високо ниво на билатералните односи меѓу министерствата за внатрешни работи на Македонија и Словенија, но генерално и меѓу двете држави беше констатирано денеска на средбата во Скопје на министрите за внатрешни работи на двете земји, Оливер Спасовски и Боштјан Поклукар.
Министерот Спасовски изрази благодарност кон Република Словенија и кон словенечкото министерство за внатрешни работи за несебичната поддршка и помош за нашата полиција во справувањето со мигрантската криза.
-Тоа беше еден од најголемите предизвици за Република Македонија, со кој можевме да се справиме само преку соработка меѓу државите од регионот, поткрепена со силната поддршка на пријателските држави – потенцира министерот Спасовски.
Работната средба се одржа во пресрет на отпочнувањето на дводневнатата Министерска конференција од „Брдо процесот“, односно Третиот состанок на Управниот одбор на иницијативата за интегрирано управување со внатрешната безбедност (ИИЦГ), што ќе се одржи утре и задутре во Скопје, а чиј домаќин е МВР.
Главна тема на конференцијата ќе биде токму евалуацијата на досегашното спроведување на Иницијативата за интегрирано управување со внатрешната безбедност (ИИЦГ), како и новите проектни задачи на ИИСГ, особено во делот на функционирањето на Групата за поддршка на ИИСГ, односно вклучувањето на преставници од Западен Балкан во работата на оваа група.
