Во заедничка египетско-американска археолошка мисија е откриен горниот дел од џиновската статуа на кралот Рамзес Втор за време на ископувањата, јужно од египетскиот град Миња, соопшти египетското министерство за туризам и антиквитети. Блокот од варовник е висок околу 3,8 метри и го прикажува Рамзес во седечка положба, со двојна круна и наметка врз главата, на која е поставена кралска кобра, изјавил водачот на тимот на египетската мисија, Басем Џихад.
– Во горниот дел на задниот столб на статуата има хиероглифски натписи што го слават кралот, еден од најмоќните фараони на Древниот Египет. Исто така познат како Рамзес Велики, тој бил третиот фараон од Деветнаесеттата египетска династија и владеел од 1279 до 1213 година пр. н.е. – изјавил Џихад.
Големината на статуата во комбинација со нејзиниот долен дел, ископан пред неколку децении, би достигнала височина од околу седум метри. Градот Ел Ашмунеин на западниот брег на Нил бил познат во Древниот Египет како Кемну, а во грчко-римско време бил регионален главен град на Хермополис Магна.
– Истражувањата потврдија дека горниот дел од статуата одговара на долниот дел, откриен во 1930 година од германскиот археолог Гинтер Родер – изјави Мустафа Вазири, шеф на египетскиот Врховен совет за антиквитети.
