Пентагон разгледува значително намалување на американското воено присуство во Европа, кое би можело да опфати околу 25.000 војници, како и авиони, бродови, оружје и друга воена опрема, објави Ен-би-си њуз, повикувајќи се на седум сегашни и поранешни американски и европски функционери.
Станува збор за една од повеќето опции што се разгледуваат во рамките на ревизијата на распоредувањето на американските сили, која Пентагон ја почна во јуни. Конечната одлука треба да ја донесе американскиот претседател Доналд Трамп по препорака на министерот за одбрана Пит Хегсет.
Според основното сценарио, од Европа би биле повлечени приближно 25.000 од сегашните околу 80.000 американски војници, што претставува речиси една третина од контингентот. Меѓу разгледуваните можности, според медиумските извештаи, има и порадикална варијанта за повлекување до 40.000 војници.
Таквото намалување би претставувало едно од најголемите повлекувања на американски сили од Европа по завршувањето на Студената војна.
Најголеми последици би можеле да почувствуваат Германија, Италија и Шпанија, каде што се распоредени значителен број американски војници и се наоѓаат важни воени бази. Дел од силите, сепак, би можеле да бидат преместени на источното крило на НАТО, наместо целосно да бидат вратени во САД.
Ревизијата се спроведува во време на загриженост кај европските сојузници поради руската агресија и можните последици од намалувањето на американското присуство врз одбранбените способности на НАТО.
Сенаторката Џин Шахин побара американските дипломати и амбасадори во Европа да бидат вклучени во разгледувањето на можните промени, предупредувајќи дека и ограничено повлекување би можело да има сериозни безбедносни и дипломатски последици. Стејт департментот соопшти дека негови претставници се вклучени во процесот.
Трамп подолго време бара европските земји да преземат поголема одговорност за сопствената одбрана, додека американските воени капацитети сè повеќе се насочуваат кон Кина, Иран и други безбедносни предизвици.
Истовремено, Трамп соопшти дека е постигнат напредок во разговорите за воспоставување постојана американска воена база во Полска. Тоа укажува дека евентуалното повлекување од делови на Европа би можело да биде придружено со прераспоредување и зајакнување на присуството на источното крило на Алијансата.
Ревизијата треба да биде завршена до крајот на годината, а Пентагон засега нема соопштено дека е донесена конечна одлука.
