Научниците од Нов Зеланд открија бебе од таканаречената ајкула дух, малку познат и редок вид риба што живее во засенчените длабочини на океанот. Ајкулите духови, познати и како химери, ретко се забележуваат, а нивните млади уште поретко. Оваа ајкула е забележана на околу 1,2 километар под вода во близината на Јужниот Остров, а научниците велат дека откритието го продлабочува нашето разбирање за најмладата фаза на видот.
– Генерално е тешко да се најдат видови во длабоко море, особено видови како ајкули духови, кои обично се доста мистериозни – изјави Брит Финучи, член на тимот што го направи ова откритие.
Ембриони од ајкула духови се развиваат во капсули со јајца поставени на морското дно. Ајкулите духови всушност не се вистински ајкули, туку вид риба. Нивните скелети првенствено се составени од ’рскавица, што им дава малку морничав изглед. Повеќето видови ајкули духови живеат во длабокото море, иако неколку вида претпочитаат да живеат во плитките крајбрежни води.
