Федералната држава Мичиген усвои нов закон што бара од секој поединец што е осуден за злоупотреба или занемарување животни да плати задолжителна отштета за грижата за животните што ги повредил, занемарил или злоупотребил. Гувернерката Гречен Витмер го потпиша законот на 27 јули, со што Мичиген стана 41-та држава што го спроведува ова барање. Гувернерката потпиша три закони за проширување на ресурсите за засолништата, помагајќи им на овие институции да добијат повеќе можности да се грижат за напуштените и злоупотребени животни и да ја ублажат нивната моментална пренатрупаност.
– Животните во нашата држава заслужуваат да бидат третирани со сочувство и грижа. Горда сум што ги потпишувам овие закони што обезбедуваат финансирање на нашите засолништа и ги заштитуваат злоупотребените и напуштените. Треба да продолжиме со истите практики за да се поддржат засолништата за животни и секое домашно милениче да биде посвоено – рече гувернерката.
Предлог-законот 106 на Претставничкиот дом, спонзориран од државната сенаторка Дана Полеханки, воспоставува регистар за собирање средства во соработка со државниот секретар и Алијансата за миленици од Мичиген за хумана и медицинска грижа за напуштени и злоупотребени животни.
Средствата би им помогнале на засолништата да спроведат стерилизација и кастрација за да се намалат пренатрупаноста и здравствените проблеми и да се поддржи персоналот во засолништата додека се грижи за животните. Предлог-законите 293 и 294 на Претставничкиот дом би го промениле сегашниот систем за кауција или одземање пари за оние што се осудени за суровост или занемарување на животните, со тоа што ќе бараат од нив да платат надомест како дел од нивната казна. Овие измени ги отстрануваат пречките за гонење случаи на суровост и занемарување на животните, а според овие законски предлози, досудените штети ќе бидат насочени кон напорите за грижа и повторно вдомување на злоупотребените животни.
Судовите можат да им наложат на сторителите да платат за ветеринарен третман, храна, засолниште, истрага и други трошоци наместо добротворните организации и даночните обврзници да ја плаќаат сметката.
