Јапонската компанија „Субаме индустрис“ разви робот со четири тркала, кој изгледа како оној од популарната јапонска анимирана серија „Мобајл суит гандам“.
Станува збор за роботот наречен АРЧХАХ, кој е висок 4,5 метри и чини три милиони долари. Неговиот кокпит е опремен со монитори, кои го прикажуваат она што е снимено од камерите поставени надвор, а „пилотот“ сместен во торзото може да ги контролира дланките и рацете со помош на џојстик.
Роботот тежи 3,5 тони и ќе биде претставен на саемот за мобилност во Јапонија месецов. Има два режима, исправен „режим на робот“ и „режим на возило“, во кој може да достигне брзина до 10 километри на час.
– Јапонија е добра во анимација, игри, роботи и автомобили, па помислив дека би било одлично ако направам производ што ги комбинира сите тие елементи во едно – вели Рио Јошида, 25-годишниот директор на „Субаме индустрис“.
Неговиот план е да произведе и продаде пет роботи, но тој сонува дека еден ден тие ќе можат да помогнат при катастрофи или во вселенската индустрија.
