Омаж по повод 20-годишнината од смртта на современиот македонски поет академик Анте Поповски ќе се одржи вечерва, во 19.15 часот, во Културно-информативниот центар во Скопје. Настанот е во организација на здружението за зачувување на делото на Анте Поповски „Антево перо“ и е составен дел од годинашното шесто издание на меѓународната поетско-културна манифестација што се одржува во чест на македонскиот книжевен великан и го носи неговото име.
Омажот всушност е мултимедијален настан, а ќе биде отворен со кус сегмент од документарниот портрет на Анте Поповски и снимка на негови стихови интерпретирани од артистот Славко Нинов. Низ програмата на овој настан ќе нѐ води модераторката Татјана Алексиќ, а за делото и творештвото на Анте Поповски пред присутните ќе беседи Венко Андоновски, дописен член на МАНУ.
Присутните ќе имаат можност да слушнат дел од првото пеење „Каин и Авел“ од грандиозното дело на Поповски „Света песна“, во изведба на артистката Софија Гогова Врчаковска, на која потоа ќе ѝ бидеврачено признанието познато како награда „Антева златна книга“. Наградата се состои од книга поетски творби од Анте Поповски во кожен повез, испишани со неговиот оригинален ракопис. Почесното признание, кое здружението за зачувување на делото на Анте Поповски им го доделува на истакнати личности, на Врчаковска ѝ припадна за нејзината повеќедецениска континуирана афирмација на творештвото на Анте Поповски, пред сѐ, на програмите на Македонската радио и телевизија, но и на повеќе настани организирани во негова чест по разни поводи.
Во чест на поетот, Атина Цветаноска ќе промовира комбинирана веб-страница што содржи голем број значајни податоци за творештвото на Анте Поповски, за здружението што се грижи за чување и афирмација на неговото дело и оставина, како и за реализацијата на шесте досегашни изданија на меѓународната манифестација „Анте Поповски –Антево перо“.
В.Д.
