Свеченото отворање на 13. „Филозофски филмски фестивал“, кој оваа година ќе се одржи во периодот од 2 до 9 јуни во Скопје, ќе се одржи денеска, со почеток од 20 ч., во летното кино „Мирно лето“ на Кинотеката, со музичкиот перформанс „Букршлиев/Мирческа Свират Колтрејн“ на Филип Букршлиев и Андреа Мирческа и македонската премиера на „Некрстени денови“ на нашиот познат режисер Иво Трајков, во рамките на Ревијалната програмa: филм-философија. По филмот, ќе следува разговор со режисерот Иво Трајков и со публиката.
Во пролетта 1939 г. се пренесува веста дека во малото планинско село Пиарџи, затрупано од лавина снег пред само неколку дена, се родил антихристот. Бискупот бара точно да се истражат изјавите на Јоанка, единствената преживеана од катастрофата, за да дознае што навистина се случило. Љубов, страст, надеж, грев и казна. Ова се зборовите што најдобро би ја опишале атмосферата во најновиот филм на Иво Трајков, симбол на модерната Содома и Гомора. Визуелно раскошна приказна, базирана на кратка приказна на словачкиот писател Франтишек Швантнер, филмот импресионира со својата оригиналност и раритетност во пристапот на темата. Преку брилијантната црно-бела фотографија, тој суптилно и нетенденциозно ни доловува атмосфера на историска драма и претставува огледало на хипокризијата на моралот, религијата и патријархалната традиција во општеството – еднакво релевантна денес, како и во периодот непосредно пред Втората светска војна.
Филмот „Некрстени денови“ во словачко-македонско-чешка копродукција има учествувано на голем број меѓународни филмски фестивали и е добитник на повеќе награди, меѓу другите и на фестивалите во Буенос Аирес, Брисел, Фестивалот на независен филм во Монтреал итн.
