Иран и Оман договорија мапа за пловидба низ Ормуската Теснина и во моментов ги разгледуваат техничките детали, соопшти портпаролот на иранското Министерство за надворешни работи, Есмаил Багеи.
Според Багеи, преговорите се конструктивни и имаат за цел да го утврдат правецот на пловидба низ стратешкиот пловен пат. Техеран, сепак, предупреди дека преминот ќе биде овозможен под услови утврдени од Иран.
Багеи го оцени јужниот правец на пловидба како „незаконски и небезбеден“, а прашањето за отстранување на мините го опиша како заедничка грижа на Иран и Оман, како две земји што излегуваат на Теснината.
Во моментов не се разговара за воведување надоместоци за бродовите, но се разгледува воспоставување механизми за надзор и обезбедување услуги. Багеи рече дека е „природно“ за тие услуги да се наплаќаат.
Тој истакна дека Ормуската Теснина нема да биде целосно безбедна сè додека трае, како што го опиша, американската политичка и поморска блокада.
Преговорите меѓу Иран и Оман започнаа по меморандумот за разбирање меѓу Иран и САД постигнат во јуни, кој требаше да биде основа за поширок договор за завршување на конфликтот и решавање на прашањата поврзани со Ормуската Теснина и иранската нуклеарна програма.
