ЕУ го намалува извозот на оружје кон Израел по избувнувањето на војната во Појасот Газа
Повеќето европски држави го ограничија извозот на оружје кон Израел без да воведат целосна забрана. Но израелските власти не се загрижени сѐ додека можат да сметаат на поддршката за снабдување со воена опрема од нивниот главен сојузник САД.
Обединетото Кралство им се придружи на земјите како Канада, Шпанија и Холандија во ограничувањето на продажбата на оружје, поради притисокот од ОН, домашните гласачи и пропалестинските активисти. Францускиот претседател Емануел Макрон исто така потврди дека Франција повеќе не му испраќа оружје на Израел.
Лондон минатиот месец ја суспендира продажбата на компоненти на оружје што ги користи Израел во Газа, откако заклучи дека постои реален ризик дека оружјето може да биде употребено во прекршување на меѓународното хуманитарно право, но одби да поддржи целосна блокада на оружјето. Делумното британско ембарго за извоз на оружје кон Израел ја остава израелската војска позависна од кога било од поддршката од нејзините врвни доставувачи, САД и Германија.
Најголемиот израелски снабдувач со оружје, Вашингтон, во мај ги прекина испораките на одредени тешки бомби за Израел поради израелската офанзива во Газа, но протокот на друга воена опрема продолжи.
Најважниот однос за Израел е со САД, неговиот главен снабдувач на оружје, а не со Европа, нагласи израелски функционер, кој побара да остане анонимен, во изјава за европското издание на магазинот „Политико“.
Прегледот што го користи Меѓународниот институт за мировни истражувања во Стокхолм, кој дава поголема тежина на поголемите и понапредни оружја, покажува дека САД и Германија обезбедуваат 99 отсто од израелскиот увоз на оружје од 2019 до 2023 година.
Берлин, наводно, годинава тивко го забави одобрувањето за извоз на воено оружје. Германија, вториот најголем снабдувач на оружје за Израел, соопшти дека извозот, кој изнесувал 326,5 милиони евра минатата година, се намалил од раните недели на војната.
Но европската продажба е засенета од американската поддршка за Израел, која неодамна беше зголемена за 26 милијарди долари и вклучува муниција од резервите на Пентагон.
Како најголем политички и воен сојузник на Израел, поддршката на САД вклучува ракетни пресретнувачи, артилериска муниција и прецизно наведувана муниција. Со десетгодишен договор, кој трае до 2028 година, САД се обврзуваат да трошат 3,3 милијарди долари годишно за воено финансирање и 500 милиони долари за ракетна одбрана.
САД не им дозволуваат само на американските производители директно да му продаваат оружје на Израел, туку обезбедуваат оружје како што се артилериски гранати директно од сопствените резерви. Американскиот претседател Џо Бајден го запре извозот на одредено оружје среде незадоволството поради израелската офанзива во Рафа, но се спротивстави на повиците за пошироко ембарго за оружје кон Израел. Р.С.
