Бугарија
Подготвил: Mарјан Велевски
Новиот бугарски министер за одбрана Тодор Тагарев рече дека Бугарија се обидува да ја зајакне својата поддршка на ЕУ за снабдување на Украина со муниција што ѝ е потребна за да продолжи да се бори против руската војска.
Министрите за одбрана на НАТО се состанаа изминатите два дена во Брисел за да разговараат за тоа како да се динамизира индустрискиот капацитет на НАТО за поддршка на Украина. И второ, како да се засилат одбранбените и одвраќачките способности на НАТО, во пресрет на клучниот самит во Вилнус, следниот месец.
Имено, за потсетување, земјите на ЕУ во мај го финализираа договорот за испраќање еден милион гранати и проектили од 155 милиметри во Киев до март следната година, согласувајќи се веднаш да дадат муниција од сопствените резерви и земјите-членки да добијат делумен надомест за своите напори. Тие договорија сума од две милијарди евра: една милијарда евра за овој дел од планот и уште една милијарда евра за заедничка шема за набавки за да се обезбедат кругови за Украина и да се наполнат нивните резерви. Комисијата исто така предложи иницијатива од 500 милиони евра за зајакнување на способноста на Европа да произведува оружје и да ги исполни овие цели.
Како дел од овој проект, Европската агенција за одбрана (ЕДА) започна зафат за земјите-членки заеднички да набават муниција, или да ги наполнат своите резерви или да ги испратат во Украина. Досега Бугарија беше една од двете земји на ЕУ – другата воено неутрална е Ирска – што не се приклучи на шемата ЕДА.
– Многу јасно се стремиме кон влез во оваа коалиција. Мислам дека ќе можеме да обезбедиме дел од потребната муниција за Украина. Нема политичка одлука за тоа, но секако ќе се потрудиме и верувам дека ќе најдеме начин – изјави Тодор Тагарев во јавноста.
Овој потег означува остар пресврт за Бугарија, чија нова влада ја презеде функцијата минатата недела, по периодот на продолжена нестабилност, во кој беа одржани пет избори во две години.
Бугарскиот претседател Румен Радев, радикална личност, но и проруски настроен, ја отфрли можноста да ѝ се приклучи на коалицијата кон крајот на март, коментира „Политико“. Понатаму се потсетува дека во декември, бугарските пратеници дадоа зелено светло за пакет воена помош за Украина по многу внатрешни борби – иако пакетот главно беше ограничен на полесно оружје.
Сепак, се појавија гласини дека земјата наводно тајно обезбедувала до една третина од потребите на Украина за муниција во раните фази на руската војна преку посредници овластени од нејзината претходна проевропска влада.
– Предноста на официјалното приклучување на Софија во коалицијата е што „традиционално, Бугарија… се специјализираше за производство на мало, лесно оружје и муниција“ уште од советско време – рече Тагарев.
Сепак, воениот експерт од кариера и одбранбен функционер тврди дека донирањето борбени авиони „МиГ-29“ и системи за противвоздушна одбрана би било „предизвик“, бидејќи резервите на Бугарија се потребни за да се задоволат сопствените потреби на земјата – истовремено признавајќи дека голем дел од тенковската флота на земјата е исто така стар половина век.
Тагарев исто така рече дека земјата е на пат да го исполни ветувањето на НАТО за зголемување на трошоците за Алијансата на 2 отсто од БДП „до 2024 година“, за што тој инсистираше дека треба да биде „минимум“.
– Украина исто така треба „апсолутно“ да биде пуштена во НАТО „кога ќе дозволат условите“ – додаде тој, што значи штом ќе заврши војната со Русија.
Сепак, придвижувањето на тој став нема да биде лесно во земја каде што само 46 отсто од луѓето мислат дека војната во Украина е целосно вина на Русија, според анкетата во декември, во споредба со просекот на ЕУ од 88 отсто.
– Многу сум загрижен за влијанието на Москва во Бугарија – изјави во јавноста новиот бугарски министер за одбрана Тодор Тагарев, додавајќи дека размислува да формира нови специјализирани единици за справување со руските наративи за дезинформација.
