Претседателот на Република Српска, Милорад Додик, денеска најави дека политичко-територијалната единица ќе прогласи независност од БиХ, доколку високиот меѓународен претставник, Кристијан Шмит, го наметне законот за имот.
– Ќе одиме во Народното собрание на Република Српска и ќе донесеме одлука за независноста на Република Српска – изјави Додик во Прњавор.
Изјавата е одговор на новинарско прашање да ги коментира информациите дека Шмит подготвува закон за имот и како ќе реагира Република Српска во случај да се наметне таков закон.
Додик претходно изјави дека смета оти прашањето за имотот е решено со Дејтонскиот договор и дека недвижен имот им припаѓа на субјектите, а не на државата Босна и Херцеговина и ја отфрли можноста Парламентот на Босна и Херцеговина да донесе закон за државна сопственост.
Владата на РС по налог на Додик ги прекина односите со САД и Велика Британија
Владата на Република Српска денеска донесе одлука за прекин на соработката со амбасадите на САД и Велика Британија во БиХ, на што американската страна веднаш одговори со порака дека тргнале по „опасен пат“.
Прекин на соработката со американските и британските дипломати во Босна и Херцеговина, претходно најави претседателот на РС Милорад Додик, кој е под санкции на САД и Велика Британија од 2017, односно 2022 година, откако Вашингтон и Лондон одлучија да го казнат за сепаратистичка реторика и поткопување на Дејтонскиот договор и корупција.
Оттогаш Додик е во постојана вербална војна со дипломатските претставници на овие две влијателни западни земји, а сега ги наведе властите на РС да донесат одлука да ја прекинат комуникацијата со нив под обвинение дека се мешаат во внатрешните работи на БиХ, наведува Хина.
– Владата ќе ги информира надлежните органи на САД и Велика Британија за прекин на соработката со амбасадите на САД и Велика Британија поради нивните антидејтонски активности и кршење на меѓународното право, Повелбата на Обединетите нации и Виенската конвенција за дипломатски односи – се вели во денешното соопштение на владата на овој ентитетот, со образложение дека оваа одлука ги обврзува и политичарите од РС кои се функционери на државно ниво на БиХ.
На одлуката на властите на РС зад која стои Додик реагираше американската амбасада со објава на социјалните мрежи во која посочија дека тоа е уште еден опасен чекор на погрешен пат.
– Тоа е патот на изолација и автократско владеење – му порачаа на Додик, додавајќи дека тој очајнички се обидува да го одржи својот корумпиран режим.
