Секој нов енергетски капацитет има значење многу пошироко од самата инвестиција, бидејќи придонесува кон создавање посигурен, постабилен и помодерен енергетски систем, порача министерката за енергетика, рударство и минерални суровини Сања Божиновска.
Божиновска денеска присуствуваше на свеченото пуштање во употреба на новата когенеративна централа на „ТЕССА Енерџи“ во Општина Чаир. На настанот присуствуваа и премиерот Христијан Мицкоски и заменик-премиерот и министер за транспорт и врски Александар Николоски.
– Нашата цел е да изградиме енергетски систем кој ќе биде сигурен, стабилен, модерен и конкурентен – систем кој ќе може да одговори и на потребите на граѓаните и на растечките потреби на индустријата – истакна Божиновска.
Таа нагласи дека енергетската сигурност не е само прашање на производство на електрична енергија, туку и на економска стабилност, конкурентност, инвестиции и квалитет на живот.
– Секој нов мегават домашно производство значи дополнителен капацитет и поголема отпорност на нашиот систем во услови на променливи цени и неизвесности на европските и светските енергетски пазари – порача министерката.
Според Божиновска, развојот на енергетиката мора да продолжи со инвестиции во нови производни капацитети, но и со вложувања во мрежата и инфраструктурата, енергетската ефикасност, обновливите извори и современите технологии.
Таа посочи дека Министерството ќе продолжи да создава предвидлива и стабилна средина за енергетски инвестиции, при што, како што нагласи, треба да се заштитат јавниот интерес и сигурноста на системот.
– Македонија треба да продолжи да гради, да инвестира и да создава нови енергетски капацитети. Но секоја инвестиција треба да носи поширока вредност – за економијата, за локалната заедница и за иднината на државата – рече Божиновска.
Новата когенеративна постројка на „ТЕССА Енерџи“ е реализирана врз основа на овластување за изградба на енергетски објект издадено од Министерството за енергетика, рударство и минерални суровини, по завршени технички прегледи и функционални испитувања.
Постројката има инсталирана моќност од 2,106 MW за производство на електрична енергија и 2,6 MW топлинска енергија.
Инвестицијата претставува прва фаза од поширок план за развој и модернизација на поранешната Топлана Скопје Север во современ енергетски центар.
Од Министерството најавуваат продолжување на политиките насочени кон зголемување на домашните производни капацитети, поголема енергетска сигурност и стабилен енергетски систем.
