Енергетската криза добива нови димензии
Цените на гасот во Европа продолжија да растат откако Германија го одложи процесот на одобрување за контроверзниот руски гасовод Северен тек 2. Германија на 16 ноември објави дека го суспендира процесот на одобрување, бидејќи швајцарскиот конзорциум зад рускиот гасовод треба да формира германска подружница за да обезбеди лиценца за работа. Тоа ги намали надежите дека гасоводот ќе биде оперативен во наредните месеци и ќе ја олесни европската енергетска криза, предизвикана од мноштво фактори, вклучувајќи ги и пониското од очекуваното производство од ветер и зголемената побарувачка со повторното отворање на економиите, јави РСЕ.
Истовремено Русија, исто така, беше обвинета за задржување на дополнителните испораки на природен гас за Европа преку постојните гасоводи што транзитираат во Украина, за да изврши притисок врз ЕУ да го забрза процесот на одобрување на Северен тек 2. САД, Украина и неколку членки на Европската Унија се противат на гасоводот Северен тек 2, со образложение дека тој ја загрозува европската енергетска безбедност. Неидентификуван германски извор изјави за Ројтерс дека гасоводот можеби нема да биде пуштен во употреба до март, кога побарувачката за природен гас веќе почнува да се намалува со почетокот на пролетта. Инаку, цените за природен гас завчера скокнаа за речиси 8 отсто. Зголемувањето на цените на природниот гас ја поттикнува инфлацијата во Европа и предизвикува страв од прекин на електричната енергија.
