В недела во Бахреин почнува сезоната во Формула 1, рекордна според бројот на трки, вкупно 23. Ова е нова сезона, со нови болиди, патеки, возачи и лица. Болидите ја имаат најголемата промена од една до друга година во претходните 40 години, можеби и досега, пишува „Би-би-си“
ФОРМУЛА 1
Со денешните тренинзи, утрешните квалификации и трката в недела, во Бахреин ќе почне новата сезона во Формула 1, рекордна според бројот на трки, вкупно 23. Тоа не е само нова сезона, туку нова ера во Формула 1, од нови болиди до нови патеки, нови возачи и нови лица…, пишува Ф1 на својата интернет-страница. Титулата ја брани Макс Ферстапен.
Болидите на Формула 1 што ја почнуваат новата сезона ја имаат најголемата промена од една до друга година во претходните 40 години, а можеби и досега, пишува „Би-би-си“. Стручњаците за аеродинамика во Ф1-тимовите работат на нивните дизајни од 2019 година. Речиси на секој дел од автомобилот е променет обликот. Не само тоа, туку има и поголема визуелна разлика помеѓу болидите од различните тимови отколку што беше веќе некое време, пишува „Би-би-си“.
Правилата се подготвуваа пет години, и тие се првите што се засноваат на опсежно истражување од Ф1, за да се промени начинот на кој болидите комуницираат едни со други. Ф1 заклучи дека најголемиот проблем со претходната генерација болиди е тоа што тие се мачеа да се следат еден со друг, што го отежнуваше претекнувањето. Имаше повеќе причини за ова, но во однос на дизајнот на автомобилот клучното прашање беше начинот на кој функционираше аеродинамиката.
Кога Ф1-болид вози по патеката, се создава воздушен бран, како водата што ја остава зад себе брод додека патува. Тој воздух е турбулентен, но на Ф1-болид му треба чист проток на воздух за неговата аеродинамика да работи оптимално и да создаде огромно количество надолна сила што му овозможува да има толку високи перформанси, пишува „Би-би-си“. Во минатото, кога еден автомобил се приближуваше до друг, воздушниот бран од водечкиот болид ја намалуваше потисната сила што можеше да ја генерира следниот болид, па се бореше да ја одржи брзината низ свиоците. Ова ги отежна блиските трки и претекнувањето.
Идејата на новите правила е да се обидат да поттикнат поголем проток на воздух. Во суштина, тие се обидуваат да го насочат целиот турбулентен воздух така што тој да оди преку горниот дел од автомобилот назад. Тимот во Ф1 и ФИА направи студии што покажуваат импресивно намалување на количеството таков воздух со кој се соочува следниот болид.
Теоретските бројки изгледаат ветувачки, пишува „Би-би-си“. Автомобилот од 2019 година изгуби 43 отсто од својата надолна сила, кога беше на растојание од една должина на автомобил зад друг болид. Спротивно на тоа, болид од 2022 година треба да изгуби само 15 проценти. На две должини од автомобил треба да изгуби само осум отсто, во споредба со 24 проценти за автомобил од 2019 година.
Многумина веруваат дека оваа измена на правилата може да биде најголемата во историјата на Ф1. Пред 40 години, во зимата 1982/1983 година, имаше толку длабока промена како оваа, пишува „Би-би-си“. Промените што се направени сега се во некој поглед спротивни од она што се случи тогаш. Таа зима креаторите на правила го забранија аеродинамичниот дизајн за потисна сила, бидејќи се загрижија дека болидите стануваат пребрзи. Тој ефект користи обликувани тунели за да го забрза воздухот под автомобилот, што создава област со низок притисок што го притиска болидот кон патеката. Од 1983 година до лани Ф1 болидите имаа рамни долни страни помеѓу предните и задните тркала. Но креаторите на правилата се вратија на тој ефект, бидејќи веруваат дека тоа ќе биде ефективно за да им дозволи на автомобилите да задржат многу поголем дел од нивната надолна сила кога се зад друг автомобил.
Сезонава можат да бидат соборени и некои рекорди, како, на пример, за најмногу титули (актуелен рекорд: Луис Хамилтон и Михаел Шумахер по седум), најдолг период меѓу победи (Рикардо Патрезе шест години, 211 дена, а може да го собори Фернандо Алонсо, кој победи во 2013 година), најмногу настапи, најмногу кругови/најмногу извозени трки (Кими Раиконен, 349 трки, 18.621 круг, 278 извозени трки, Алонсо има 333 трки и 586 круга помалку од Раиконен, а Алонсо и Хамилтон се во конкуренција за извозени трки, Хамилтон заостанува пет зад Алонсо, кој заостанува 13 зад Раиконен), најмногу победи на исто гран-при (Михаел Шумахер и Луис Хамилтон по осум), најмногу подиуми во една сезона (Макс Ферстапен 18), најмногу последователни сезони со барем една победа (Михаел Шумахер и Луис Хамилтон по 15), најмногу последователни извозени трки (Луис Хамилтон 48) итн.
