ФУДБАЛ
- Тоа е проценетата вкупна вредност на напаѓачите што се очекува Франција да ги има на СП 2026, од двократната голгетерска сензација на финалиња на СП, Мбапе, до ѕвездата во подем Дуе. За селекторот Дешан главоболката не е во тоа кого да избере, туку кого да изостави од својот почетен состав за првиот меч на Франција на СП годинава, пишува АП
Репрезентацијата на Франција ќе има голема длабочина во нападот на Светското првенство (СП) во фудбал годинава, со вредност од околу една милијарда долари, пишува агенцијата „Асошиејтед прес“ (АП). Тоа е проценетата вкупна вредност на напаѓачите што се очекува Франција да ги има на турнирот, од двократната голгетерска сензација на финалиња на СП, Килијан Мбапе, до ѕвездата во подем Дезире Дуе. За селекторот Дидие Дешан, главоболката не е во тоа кого да избере, туку кого да изостави од својот почетен состав за првиот натпревар на Франција на СП 2026, пишува АП.
Тој има огромен број талент за да го надополни ефикасниот Мбапе, кој ужива во уште една сезона со голови со Реал Мадрид и му треба уште еден погодок за да се израмни со Оливие Жиру како најдобар стрелец на репрезентацијата на Франција на сите времиња, со 57 гола. Тука се брзината и головите на освојувачот на „Златната топка“ Усман Дембеле, прецизните голови и извонредните додавања на Микаел Олисе, неконвенционалната вештина на технички надарениот Рајан Черки или брзите трчања на колегата новодојденец Магнес Аклиуш, пишува АП.
Според процените од фудбалската интернет-страница „Трансфермаркт“ и фудбалската опсерваторија ЦИЕС, кои го земаат предвид преостанатото време од договорот на играчот, десетте напаѓачи на Франција вредат 855 милиони евра, што е малку повеќе од една милијарда долари, пишува АП.
Суперѕвездата на Реал Мадрид е предводник со 200 милиони евра (236 милиони долари). По Мбапе следува ѕвездата на Баерн, Олисе, со 140 милиони евра. Формата на Олисе е блескава за шампионот на Бундеслигата, Баерн, со 18 гола и 25 асистенции во 44 натпревари. Дваесетгодишниот Дуе има уште три години од договорот со ПСЖ и е проценет на околу 115 милиони евра во споредба со 100 милиони евра за Дембеле, кој има уште две години да игра во ПСЖ и е осум години повозрасен, нивниот соиграч од ПСЖ, кој е голгетер, Бредли Баркола е следен на листата со 70 милиони евра, а по него е Черки со 65 милиони, пишува АП.
Черки првпат го привлече вниманието пред шест години, кога имаше 16 години, постигнувајќи два гола во натпревар од Купот на Франција за Лион, а влезе во нова димензија откако му се приклучи на Манчестер сити. Аклиуш постигна гол во двата натпревара за Монако против ПСЖ во плејофот од Лигата на шампионите, неговите трчања од длабочина го прават тешко да се следи, способен е и за брилијантни индивидуални голови, а е проценет на 50 милиони евра заедно со напаѓачот на Интер, Маркус Турам, кој е во одлична форма во претходните недели. Турам додава напаѓачки опции на Франција благодарение на неговата способност за играње со глава, силна страна што ја дели и Жан-Филип Матета, кој, пак, е постојан стрелец за премиерлигашот Кристал палас и постигна два гола на три настапи за „сините“. Матета е проценет на 35 милиони евра, пред поранешниот напаѓач на ПСЖ, Рандал Коло Муани, кој е на заем во Тотенхем, пишува АП. Н.М.
