Здрава храна
Што имаат заедничко цикоријата, грејпфрутот и прокељот? Тие содржат супстанции што се откриени од рецепторите за горчлив вкус на нашиот јазик. Тие се здрави намирници, па дури и да не сакаме горчлива храна, добро би било повремено да ја внесуваме во исхраната. Од петте различни видови вкусови, слатко, солено, кисело, горчливо и пикантно, горчливиот вкус несомнено не е најомилен. Ако мислите дека горчината е нешто што треба да го избегнувате, го пропуштате вкусот и хранливите придобивки од многу намирници. Горчливата храна може да има остар, често лут вкус. Некои горчливи намирници имаат посуптилен вкус, а во многу такви намирници наоѓаме и елементи на сладост или киселост.
Нутриционистите веруваат дека заедничкото својство на горчливата храна е нивната корист за цревата и варењето. Горчливата храна ја поттикнува работата на дигестивниот систем, го намалува апетитот и ги ослободува дигестивните сокови во панкреасот. Затоа, може да биде корисно да се испие горчлив пијалак пред јадење или да се додаде горчлива храна во оброкот или како предјадење.
– Нам ни е вродено тоа, бидејќи горчливиот вкус обично сигнализира дека нешто може да биде отровно – објасни Кристина Есер, предавачка на германскиот универзитет за превенција и здравствен менаџмент.
Многу растенија произведуваат горчливи материи токму за да се заштитат од предатори. Но можете да се навикнете на горчливиот вкус. Тоа објаснува зошто некои луѓе не уживаат во првата голтка незасладено кафе или зошто многу деца мразат прокељ.
Горчливите материи го подобруваат варењето, објаснија од германската организација за помош на дијабетичари. Тие го поттикнуваат производството на стомачна киселина и жолчка, што го олеснува варењето на мрсната храна. Горчливата храна истовремено ги намалува чувството на глад и желбата за слатки, што е предност за лицата со дијабетес или прекумерна тежина, но и за сите други.
Есер истакнува дека горчливите материи имаат антиинфламаторно дејство и можат да го намалат ризикот од развој на срцеви заболувања.
– Доколку сакате да внесете повеќе горчливи материи во вашата исхрана, најдобро е тоа да го правите чекор по чекор. Прво можете да комбинирате горчливи и слатки компоненти. Зелена салата и цикорија помешани со бобинки од калинка и солено-сладок прелив се вкусен почеток – советува Есер.
