„Во песничките се видливи сказноликото шаренило и басноликото параболично соѕвездие. Снешко, Ешко и Клукајдрвчо, чавки, страчки и мачки… хумористично се надмудруваат низ немуштиот јазик филозофираат, си реплицираат, се челичат златните струни на мислата… Секоја песна е поинаков предизвик“, вели рецензентката Милица Димитријовска Радевска
„Збрка во трка“ – ново дело за деца и млади на писателката Весна Мундишевска-Велјановска
Неодамна од печат излезе поетската збирка „Збрка во трка“ на Весна Мундишевска-Велјановска, во издание на „Перун артис“, наменета за деца и млади, но со препорака дека ако ја прочитаат, во неа ќе уживаат и родителите, пријателите, наставниците… Мотивите во песните се истовремено секојдневни, но и необични, реални и фантастични. Тоа е книга полна со безгранична слобода на духот и на фантазијата, со недоброј можности за креативност и имагинација на секој чинител во интерактивното комуницирање со оваа поезија.
– Поетската кодификација во „Збрка во трка“ е како огледало во кое се огледуваат сонцата на безброј детски универзуми во кои детето учи и мудрува или, пак, се радува на безброј свои палавштини, или ужива во истражувачките авантури на својот љубопитен дух. Тоа се универзуми во кои животворно бидуваат и децата и животните и растенијата и воздухот и светот, едноставно вселена на среќата во која сите говорат ист јазик – јазикот на невиноста и радоста, во кој сите срца чукаат како едно големо срце – срце на најчистата полнокрвна љубов, во кој сите дишат во ист здив – здив на безгрижноста и бескрајниот спокој – истакнува авторката Весна Мундишевска-Велјановска.
Автор на илустрациите во книгата и на илустрацијата на корицата е младиот ликовен уметник Константин Солак, а дизајнот на корицата е на авторката Мундишевска-Велјановска.
Рецензентка на книгата е писателката Милица Димитријовска Радевска, која меѓу другото вели:
„Во песничките се видливи сказноликото шаренило и басноликото параболично соѕвездие. Снешко, Ешко и Клукајдрвчо, чавки, страчки и мачки… хумористично се надмудруваат, низ немуштиот јазик филозофираат, си реплицираат, се челичат златните струни на мислата… Секоја песна е поинаков предизвик. За да го следите тој ритам мора постојано да сте активни и да се движите со брзи прескокнувања на сите вмрежени полиња на мисловната мапа – час хоризонтално, час вертикално за да го решите крстозборот, но и да создадете нов, да креирате игра во духот на дигитализацијата. Крукче или икс, нула или еден, бинарни опозиции, квадратчиња, бели полиња, муви и пајачиња, мачиња и мечиња, и комарец и оса… Кога пред неколку години бев гостинка како писател во една детска градинка, сфатив колку е очигледна потребата за книги за деца. Оваа книга во секој поглед го овозможува тоа на сите нивоа. Да радува и облагородува, да води и поттикнува креативност, да забавува и насмејува, да потсетува дека во секој од нас спие едно дете – разбудете го!“
Весна Мундишевска-Велјановска издала 13 книги поезија, две книги со критичко-есеистички текстови и две книги со песни за деца, а (ко)авторка е и на шест стручни книги и три учебници, како и на стотина трудови од областа на образованието. Нејзината поезија е преведена на повеќе странски јазици. Застапувана е во антологии и добитничка е на награди. Уредничка е на списанието за култура „Современи дијалози“, а била уредничка и главна уредничка на неколку списанија и билтени („Раст“, „Плима“, „Изрек“, „Грст“, „Графопрес“, „Разгледи“, „Воспитни крстопати“), како и на четириесетина поетски книги и зборници. Била претседателка на друштвото за литература и култура „Развиток“ – Битола и на Книжевната младина на Македонија – ОК Битола, како и секретарка на друштвото на писателите „Битолски книжевен круг“ и членка на Уредувачкиот совет на МНД. Настапувала на голем број книжевни манифестации, а ја уредувала и водела радиоемисијата „Поетска квечерина“ на Радио Битола. Членка е на Друштвото на писателите на Македонија, на Македонското научно друштво – Битола и на друштвото на писателите „Битолски книжевен круг“. Амбасадорка на мирот е во Универзалниот круг на амбасадори на мирот – Швајцарија/Франција од 2016 година (Cercle Universel Des Ambassadeurs De La Paix – Suisse/France).
Мува
Брм, брм, брмка
една мала црнка,
досадна и брза,
врвна светска мрза.
Носот ми го гази
без да рече „Пази!“,
ручекот го мерка
како стрвна ѕверка.
„Бегај муво. Доста!“
– бесно викна Коста.
„Направи си пита,
па ќе бидеш сита!“
Шумско кино
Клукајдрвчо тропа: трас,
брзајте на час,
ќе правиме кино
Црвчо, јас и Нино!
Ќе јадеме пица
на брегот на Ибица,
ќе пиеме сокче
на вселенско бротче.
И Марс ќе го видиме,
и пирати ќе бидеме,
ќе каснеме и благо
под палми на Тобаго.
Се јави Страчко Умец
– главен ќе бил глумец,
со такси со две едра
слета сред катедра,
проекторот го скрши
и филмот, ете, сврши.
