Кинескиот советник и министер за надворешни работи Ванг Ји, во телефонски разговор со својот руски колега Сергеј Лавров, порача дека Кина повикува на целосно откажување од каков било менталитет на Студената војна, како и безбедносен систем за Европа, кој е избалансиран, ефективен и одржлив и постигнат преку разговори и преговори, пишува Ванг Чингјун за „Чајна дејли“
Ставови на кинескиот државен врв во однос на кризата на истокот на Европа
Кина секогаш го почитува суверенитетот и територијалниот интегритет на сите земји, а исто така ги разбира разумните безбедносни грижи на Русија, бидејќи зад украинското прашање се крие комплицирана и посебна историја, изјави во четвртокот државниот советник и министер за надворешни работи Ванг Ји, во разговорот со рускиот министер за надворешни работи Сергеј Лавров. Во разговор со Лавров по телефон, Ванг рече дека Кина повикува на целосно откажување од каков било менталитет на Студената војна, како и безбедносен систем за Европа, кој е избалансиран, ефективен и одржлив и постигнат преку разговори и преговори. Лавров рече дека Русија е принудена да ги преземе неопходните мерки бидејќи САД и НАТО не успеале да ги почитуваат своите ветувања дека нема да ја прошират организацијата кон исток, одбија да го имплементираат Вториот договор од Минск и ја прекршија резолуцијата 2202 на Советот за безбедност на Обединетите нации.
Портпаролката на Министерството за надворешни работи, Хуа Чунјинг, во четвртокот рече дека Русија, како независна голема земја, одлучува и ги спроведува својата дипломатија и стратегии врз основа на сопственото проценување и националните интереси. Таа рече дека односите меѓу Кина и Русија се несојузнички, неконфронтирачки и не се насочени кон трети страни. Хуа ги даде забелешките на прес-конференција откако портпаролот на американскиот Стејт департмент, Нед Прајс, рече дека Кина треба да ја повика Русија да „повлече“ и да ги „деескалира“ тензиите со Украина, и додаде дека растечкото партнерство меѓу Кина и Русија е „загрижувачко“.
На сугестија на САД дека Москва го направила потегот затоа што ја добила поддршката од Кина, Хуа рече дека верува оти руската страна ќе биде „многу незадоволна да слушне такво гледиште“. Врските меѓу Кина и Русија се фундаментално и суштински различни од „малите групи“ што САД ги спроведуваат, врз основа на идеолошки линии, за да создадат конфронтација и одвојување, рече Хуа. Таа додаде дека Кина не е заинтересирана и нема намера да го имитира менталитетот од Студената војна со поделбите на „непријатели или пријатели“ или практиката на крпење на таканаречените „сојузи“ и „мали клики“.
Хуа рече дека САД немаат право да ѝ кажат на Кина што да прави во врска со почитувањето на државниот суверенитет и територијалниот интегритет. Кина доследно и цврсто ги чува начелата и принципите на Повелбата на ОН, како и основните норми што ги водат меѓународните односи, рече таа. Сепак, во 250 години од нивното основање, САД само се воздржуваа од воени операции во други земји помалку од 20 години, истакна портпаролката.
– Таквата земја сигурно има поинакво разбирање за почитување на државниот суверенитет и територијален интегритет од нас. Меѓународната заедница јасно го знае тоа – истакна Хуа.
На прашањето дали Кина обезбедила или планира да ѝ обезбеди оружје на Русија, Хуа рече дека Кина не презема иницијатива да обезбеди оружје за другите што се соочуваат со ризик од конфликт, „за разлика од кога САД обезбедија големо количество воена опрема за Украина“.
