ФУДБАЛ
- Емери успева да најде време во текот на деновите да ја отвори својата апликација за шах и да игра триминутни партии против кои било играчи. Тоа е само еден од методите што педантниот тренер на Астон вила ги користи за да ја усоврши менталната дисциплина потребна на највисокото фудбалско ниво. Тој, исто така, гледа предавања, дури и во 2 часот наутро, а негов особен интерес претставуваат луѓето што го објаснуваат светот на нови начини, научници, мислители, секој што може да ја прошири неговата референтна рамка. Друга активност во 2 часот наутро е гледање фудбал на кое било ниво…
Замислете го Унаи Емери како вчитува шаховска апликација на својот телефон за да игра против непознати, под свое име. Тоа е само еден од методите што педантниот тренер на Астон вила ги користи за да ја усоврши менталната дисциплина потребна на највисокото фудбалско ниво, пишува „Би-би-си“. И Емери е сигурно велемајсторот на Лига Европа, откако повторно го освои трофејот со победата на Астон вила во финалето со Фрајбург со 3-0, за прв трофеј на клубот по 30 години и негов петти триумф во тоа натпреварување.
Емери претходно ја водеше Севилја до пехарот во Лига Европа три години по ред, во 2014, 2015 и во 2016 година, пред да го оствари својот четврти успех со Вилјареал во 2021 година. По пет години, Шпанецот повторно се сретна со трофејот и се изедначи со Карло Анчелоти, Жозе Мурињо и со Џовани Трапатони на листата на тренери со најмногу големи европски пехари (по пет).
„Би-би-си“ подетално го разгледува човекот што ја водеше Астон вила до прв европски трофеј од 1982 година. Астон вила има европска титула и победа во Суперкупот на УЕФА во 1982 година.
Предавања во 2 часот наутро и мечеви на Сантандер
Емери наоѓа време во текот на деновите да ја отвори својата апликација за шах и да игра триминутни онлајн партии против кои било играчи. Идејата тренер од Премиер-лигата да го прави тоа под свое име можеби звучи чудно, но е вистина. Тој верува дека мора да бидете подготвени за сѐ и не можете да си дозволите да се исклучите. Но не е само шахот оној што му го привлекува вниманието на Емери. Тој, исто така, гледа предавања. Дури и во 2 часот наутро. Негов особен интерес претставуваат луѓето што го објаснуваат светот на нови начини, научници, мислители, секој што може да ја прошири неговата референтна рамка. Друга активност во 2 часот наутро е гледање фудбал на кое било ниво на неговиот ајпад. На пример, Сантандер, кој штотуку беше промовиран во Првата лига на Шпанија. Не е гигант од Лигата на шампионите (ЛШ) или ривал, но тоа не го спречува Емери да го проучува, пишува „Би-би-си“. Тоа е неговиот начин на опуштање.
Пласман во ЛШ ѝ избега на Астон вила во последното коло од минатата сезона, но првиот чин на Емери беше да им каже на своите играчи дека можат да стигнат до таму сезонава, дури и ако другите тимови имаат поголеми буџети, пишува „Би-би-си“. Неговата цел беше далеку да стигнат во Лига Европа и да обезбеди место во Лигата на шампионите. Работата е завршена во двата случаја.
Пет натпревари без победа во почетокот на сезоната не беше во сценариото, но Емери успеа да ја убеди Астон вила дека сезоната ќе биде добра.
„Никој не работи понапорно од Емери“
Емери вели дека никој не работи понапорно од него. Тој не се фали, само ја објаснува својата методологија. Тој се фокусира на обликот на телото на тренинзите, тактиките, физичките детали, принудувајќи ги играчите да посветат 70 отсто од своето време на фудбалот, пишува „Би-би-си“. Тој зборуваше за своите родители и за чувството на одговорност што го всадиле во него.
Што и да прави, го прави целосно. Исполнувањето на целта е, секако, професионален резултат, но е и одговорност што ја презема лично. За да го одржи тоа, тој научил жестоко да ја заштити својата концентрација. Тој е во состојба да игнорира секаква надворешна бучава. Кога Астон вила беше критикувана за одморање клучни играчи во нивниот домашен пораз од Тотенхем пред реваншот од полуфиналето на Лига Европа против Нотингем форест, Емери не трепна, пишува „Би-би-си“. Тој пресмета дека бодовите што им се потребни во лигата за да обезбедат пласман во Лигата на шампионите ќе дојдат од некое друго место доколку бидат потребни. И беше во право. „Вила Парк“ помогна. Емери отсекогаш црпел енергија од трибините што веруваат.
Што е следно кога ќе заврши сезоната? Тој ќе оди во неговиот роден град Хондарибија или во омилената дестинација за одмор Мајорка за да прошета покрај морето и да се сретне со пријатели што немаат никаква врска со фудбалот. Тој ќе помине време со својата мајка. Можеби дури и ќе ѝ се придружи кога таа оди секојдневно на пливање покрај баскискиот брег и ќе си дозволи да спие малку повеќе од вообичаено.
Тогаш ќе почнат подготовките за следната сезона.
Од 16. место до европски победник – револуцијата на Емери во Астон вила
Обемот на револуцијата на Емери во Астон вила не може да се потцени. Кога Шпанецот ја презеде функцијата на 1 ноември 2022 година, тимот беше 16-ти во Премиер-лигата, две места и еден бод над зоната за испаѓање. Тимот потоа победи во 15 од своите 25 првенствени натпревари, освојувајќи го 7. место и пласман во европските натпреварувања првпат од сезоната 2010/2011. Во својата прва целосна сезона, Емери обезбеди за Астон вила пласман во ЛШ, првпат од сезоната 1982/83. Неговиот тим, исто така, победи на 15 последователни домашни лигашки натпревари – најмногу во нивната 151-годишна историја. И сега, со повторно обезбедено пласман во ЛШ, Астон вила е победник на континентално натпреварување првпат по повеќе децении.
Поранешниот играч од средниот ред на Астон вила, Марк Албрајтон, изјави за „Би-би-си“ дека Емери „ја однесе Вила на следното ниво“.
– Ќе има моменти кога ќе имате подеми и падови, тоа е природата на фудбалот. Астон вила имаше некои од тие падови, но сега се на огромен врв. Емери беше чекор напред во однос на она што го имаа претходно – рече тој.
Ешли Јанг, друг поранешен играч на Астон вила рече: „Штом Унаи Емери дојде во Астон вила, играчите видоа што направил во својата кариера, ги видоа трофеите што ги освоил во Лига Европа и клубовите што ги тренирал. Емери е роден победник, особено во ова натпреварување. Ставете го неговото име покрај Анчелоти и Мурињо. Тој го врати овој клуб во Европа, во Лигата на шампионите. Да речевте кога бевме на 16. место во Премиер-лигата дека тој ќе дојде и ќе ја освои Лига Европа, ниту еден играч не би помислил дека тоа ќе биде вистина. Тој едноставно има начин“, пренесе „Би-би-си“. Н.М.
