Техно
На меѓународна технолошка конференција во Барселона, „Кортикал лабс“, стартап со седиште во Мелбурн, го претстави ЦЛ1, првиот комерцијален биолошки компјутер во светот. Овој систем содржи човечки неврони израснати во лабораторија, кои се способни да учат врз основа на внесување податоци.
Ветвер-ес-а-сервис е термин што се користи за опишување услуга во која биолошките системи, како што се неврони развиени во лабораторија, се користат како компјутерски ресурси достапни преку облакот, на сличен начин како традиционалните компјутери или софтверските услуги. Во тој контекст, се однесува на биолошки компоненти (како што се човечки неврони).
За разлика од конвенционалните компјутерски ресурси што користат хардвер (како што се сервери и процесори), во овој случај биолошките пресметковни системи користат делови од жив организам (како што се неврони) за обработка на податоци и извршување компјутерски задачи. Овој чекор, кој се смета за пресвртница во светот на компјутерската технологија, може значително да го промени нашиот пристап кон вештачката интелигенција.
ЦЛ 1 е создаден како резултат на истражување и иновација што започна во 2022 година, кога научниците од „Кортикал лабс“ успеаја да ги научат невроните да ја играат играта „Понг“. Тогаш за првпат беше докажано дека биолошките компоненти можат да научат и да одговорат на надворешните стимули, што ја отвори вратата за нови типови на компјутерски системи. Д-р Брет Каган, главен научен директор на компанијата, нагласи дека ЦЛ 1 не е само технолошки напредок туку и потенцијално револуционерна алатка за апликации во различни индустрии.
– Нашата цел е да ги примениме биолошките неврони за развој на нови лекови, моделирање болести и напредни истражувања за вештачка интелигенција. Биолошките компјутери како ЦЛ 1 нудат ефикасност и брзина на учење што традиционалните компјутери не можат да ги постигнат, а сето тоа со минимална потрошувачка на енергија – рече Каган.
