Грчката државна компанија „Хеленик дифенс системс“ се подготвува за локално производство на муниција со долг дострел преку партнерство со јужноафриканската групација „Парамаунт“, потег чија цел е зајакнување на автохтоните производствени капацитети на земјата.
Системот наречен ИРИКС ќе биде прв од ваков вид произведен во Грција, која погледнато низ историјата немаше значаен домашен пазар за вооружени беспилотни летала или муниција за нив. Земјата го претстави своето прво борбено беспилотно летало направено локално дури во јануари годинава.
Грчкиот продавач ЕА, го објави потпишувањето на стратегиското партнерство со глобалната воздухопловна компанија „Парамаунт“ за новото оружје на конференцијата за одбранбената индустрија во Атина минатата недела.
Системот ИРИКС е заснован на постојната технологија на беспилотно летало „Н-равен“ на „Парамаунт“. „Н-равен“, произведен од подружницата „Парамаунт аероспејс системс“ (ПАС) со седиште во Обединетите Арапски Емирати, започна со производство минатиот месец во Абу Даби, а првите испораки беа закажани за октомври.
Говорејќи за специјализираниот медиум „Дифенс њуз“ на Меѓународната изложба и конференција за одбрана во Абу Даби, ОАЕ, во февруари, претставник на „Парамаунт“ рече дека системот е дизајниран специјално за брз трансфер на технологија со цел да се олесни локализацијата за клиентите.
Тоа сценарио се очекува да се одигра во Грција со ИРИКС. Грчката компанија исто така ќе учествува во тековното истражување и развој на идните надградби што ќе се направат на платформата.
Специфичните способности на новата муниција за дронови допрва треба да бидат откриени пред јавноста.
Парамаунт го опишува дронот како рентабилен систем способен да погодува цели со висока вредност длабоко во непријателската територија, како и да обезбедува воздушно извидување.
Со оглед на тоа што неговиот дизајн се базира на „Н-равен“, ИРИКС може да има долготрајна издржливост помеѓу 2 и 4,5 часа, досег до 100 километри и повеќе од 13 килограми носивост.
ПАС исто така претходно изјави дека подобрената верзија на „Н-равен“ е во напредна фаза на развој и се очекува да биде индустријализирана во втората половина на 2024 година. Останува нејасно дали Грција планира да се вклучи во оваа фаза на производството.
