ЕУ со нови санкции за Русија, Кремљ возвраќа со контрасанкции и „црна листа“ за европски функционери
- Најновата размена на санкции и контрасанкции јасно укажува дека односите меѓу Брисел и Москва остануваат длабоко нарушени, без видливи знаци за деескалација. Наместо тоа, двете страни продолжуваат со политички и економски притисоци, кои сè повеќе се рефлектираат и врз глобалните текови, од енергетиката до финансиските пазари
Тензиите меѓу Европската Унија и Русија дополнително се заоструваат откако Брисел го усвои својот 20-ти пакет санкции, а Москва експресно возврати со сопствени рестриктивни мерки и проширена „црна листа“ на европски функционери.
Руското Министерство за надворешни работи деновиве соопшти дека на листата се вклучени голем број политичари и јавни личности од европските земји, кои, според Москва, имаат директна улога во креирањето и спроведувањето, како што ги нарекуваат, „антируски политики“. Мерката претставува одговор на најновиот пакет санкции на ЕУ, кој беше официјално усвоен на 23 април.
Што содржи новиот пакет санкции на ЕУ?
Најновиот 20-ти пакет санкции на Европската Унија се смета за еден од најобемните во последните две години. Во него се вклучени:
• 120 нови санкционирани субјекти и поединци;
• ограничувања насочени кон енергетскиот сектор и воено-индустрискиот комплекс;
• забрани за трансакции со 20 руски банки;
• рестрикции за услуги поврзани со ЛНГ-танкери и мразокршачи;
• санкции за дополнителни 46 брода од руската т.н. флота во сенка.
Со тоа, вкупниот број санкционирани руски бродови достигна 632, што претставува сериозен удар врз руските обиди да ги заобиколат претходните ограничувања.
Кои се руските контрамерки?
Според официјалното соопштение на руското МНР, на „црната листа“ се нашле:
• европски функционери вклучени во обезбедување воена помош за Украина;
• политичари што поддржуваат мерки против територијалниот интегритет на Русија;
• креатори и поддржувачи на санкциите против Москва;
• лица што работат на ограничување на руските надворешни односи;
• функционери поврзани со попречување на руската поморска пловидба.
Дополнително, Русија цели и политичари што се залагаат за формирање меѓународен трибунал против руското раководство, како и оние што поддржуваат заплена на руски државен или приватен имот во странство.
Во проширениот список се вклучени и граѓански активисти, академици, како и членови на националните парламенти и на Европскиот парламент што гласале за резолуции и закони насочени против Русија. Во соопштението, руската дипломатија остро ја критикува политиката на Брисел, оценувајќи ја како „деструктивна“ и без реално влијание врз стратешките определби на земјата.
– Деструктивната политика на Брисел не може да има никакво влијание врз насоката на надворешната политика на нашата земја. Русија останува посветена на заштита на своите национални интереси и на градење праведен мултиполарен светски поредок – се наведува во реакцијата.
Продлабочување на геополитичката поделба
Најновата размена на санкции и контрасанкции јасно укажува дека односите меѓу Брисел и Москва остануваат длабоко нарушени, без видливи знаци за деескалација. Наместо тоа, двете страни продолжуваат со политички и економски притисоци, кои сè повеќе се рефлектираат и врз глобалните текови, од енергетиката до финансиските пазари.
Во вакви услови, аналитичарите предупредуваат дека санкциската спирала може да продолжи да се продлабочува, со потенцијални долгорочни последици не само за Европа и Русија туку и за поширокиот меѓународен поредок. Р.С.
