Министрите за надворешни работи на Австрија, Чешка и Словачка се во посета на Македонија за да помогнат да се постигне политички консензус меѓу македонските партии за вклучување на бугарската заедница во Уставот.
Европските министри ги испрати високиот претставник за надворешна политика на Европската унија, Жозеп Борел, за да им ги пренесат на политичарите од власта и опозицијата официјалните позиции на Брисел за пристапното досие на Македонија.
Вклучувањето на бугарската заедница во Уставот е дел од обврските што Македонија ги презеде со усвојувањето на преговарачката рамка и се услов за понатамошни преговори и почеток за отворање нови поглавја.
– Ако не ги прифати уставните измени и не продолжи да оди кон европскиот пат Македонија се соочува со опасноста да биде изолирана, порача денеска од Скопје шефот на австриската дипломатија Александар Шаленберг на заедничката прес-конференција со неговиот домаќин Бујар Османи и министрите за надворешни работи на Чешка и на Словачка, Јан Липавски и Мирослав Влаховски кои се во посета на земјава.
– Штом ќе почнат преговорите, тоа е неповратен процес. Земјата чека 18 години да дојде до овој момент. Сега вам ви останува да го искористите овој момент. Политички треба да се биде одговорен и пред се да се имаат националните интереси. Моментот е сега и ве уверуваме дека не се мешаме во внатрешните работи на земјата – порача Шаленберг.
Шаленберг нагласи дека не се случува секој ден тројца министри на три членки на ЕУ да дојдат во земја на Западен Балкан, што, како што кажа, треба да биде силна порака за вас
– Нашата порака е едноставна и силна – тоа е порака на охрабрување, нема време за губење, би сакале да продолжите со потребните уставни измени за да почнете со преговорите за членство. Да се одложи усвојувањето на амандманите значи да се одложи пристапувањето на Македонија. Би било штета Скопје, откако истрча еден тежок маратон да се сопне на следната пречка. Долг пат изминавме заедно и надминаме многу тешкотиии – дециден е тој.
Порача и дека задача на сите граѓани од оваа држава е да не отидат залудно сите овие напори.
-Навистина ми е задоволство и чест да сум ваш домаќин. Вашата посета ја читам како силна принципиелна поддршка на Северна Македонија и нејзината европска перспектива, поддршка која што всушност и никогаш не отсуствувала од вашите земји – рече од своја страна Османи.
Османи кажа дека денеска повторно се наоѓаме на крстопат.
– Од една страна започнати преговори, успешно спроведен скрининг и на неколку месеци пред отворањето на кластерите и поглавјата. Но, за првпат нам ни е даден клучот – самите да ги отклучиме поглавјата и кластерите и успешно да го продолжиме процесот на преговорите – рече Османи на прес-конференцијата со тројцата министри од ЕУ.
Министрите за надворешни работи на Австрија, Чешка и Словачка попладне ќе одржат прес-конференција и во Делегацијата на ЕУ во Скопје.
