Учениците од основното училиште „Лазо Ангеловски“ во општина Аеродром останаа дома. Ова е резултат на бојкотот кој се случува во ова училиште по најавите дека проблематичниот ученик повторно би можел да се врати овде.
– Формирана интердисциплинарна комисија составена од претставници на министерството, Бирото за развој на образованието, општината, училиштето и социјалните служби, која се состанува за разгледување и преземање соодветни мерки и активности согласно законската регулатива, во чиј фокус се најдобрите интереси на ученикот, но и на сите инволвирани – велат од МОН.
Во меѓувреме, во Основното училиште 11 Октомври денеска наставата продолжи да се одвива нормално. Вчера во одговор на новинарско прашање министерката за образование и наука Весна Јаневска, рече дека реакцијата на родителите е пренагласена, истакнувајќи дека секое дете заслужува образование и дека има служби кои треба да работат на подобрување на неговото поведение.
