Министерот за внатрешни работи Оливер Спасовски потенцираше дека 2022 за МВР беше успешна година, не само во делот на сузбивањето на трговијата со дрога и оружје, туку и генерално, во интервју на „ТВ Плус“.
– Ако имате податок од 6 отсто намалување на вкупниот број на кривични дела и 18 отсто на зголемување на ефикасноста споредено со 2021 година, тоа покажува дека активностите кои се преземаат во континуитет даваат резултати, а 2021 година беше година во која што имавме најдобри резултати во последните 30 години од независноста на државата до денес. Ако во 2022 година има подобри резултати, тоа значи дека сега се тие уште подобри, односно тие се најдобри во последните години. И тоа треба да ни биде целта. Еве сега, во првите денови од јануари, покрај многуте празници, се посветуваме и самите на себе како институција. Секојдневно имаме координативни средби со колегите на кои што практично ги анализираме овие состојби и ги задаваме стратешките приоритети за тековната 2023 година – истакна Спасовски.
Тој подвлече дека борбата против трговијата со дрога и оружје ќе биде еден од врвните приоритети и годинава.
– Минатата година имаме 2,4 тони запленета дрога со вкупна вредност од околу шест милиони евра. Најголемиот дел од заплените се марихуана, меѓутоа имаме и хашиш, имаме и кокаин, има и хероин, амфетамини и околу 20 тони прекурсори за производство на синтетичка дрога. Пред 2,5 месеци имавме уништено најголема количина на дрога од 90-та година до денеска, некаде 10,3 тони наркотична дрога. Имаме притоа спречено неколку меѓународни транспорти на дрога по меѓународни канали кои поминуваат од соседството. Сето тоа останува приоритет и во наредниот период за овие криминални структури кои се занимаваат со разни видови на криминали да бидат изведени пред лицето на правдата – дециден беше министерот.
