Економско-политичка опсервација на македонско-турскиот бизнис-форум во Турција
Рефлексии од македонско-турскиот бизнис-форум во Истанбул
- Македонско-турските односи одамна ја надминаа рамката на класично пријателство и се развиваат врз основа на стратешко партнерство што отвора нови економски, политички и безбедносни перспективи за двете држави
Во период кога геополитичките турбуленции сè посилно влијаат врз економските текови, а државите се натпреваруваат за инвестиции, пазари и нови развојни можности, Македонија и Турција демонстрираа пример за партнерство што не се темели само на историски врски и традиционално пријателство туку и на јасно дефинирана стратешка визија за иднината.
Посетата на македонската владина делегација на Истанбул и одржувањето на македонско-турскиот бизнис-форум претставува уште една потврда дека односите меѓу двете земји одамна се на повисока фаза на заемна доверба. Она што е препознатливо преку конкретни економски иницијативи и инвестициски понуди, всушност има подлабока институционална и политичка основа.
Билатерални односи од стратегиски карактер
Македонија и Турција веќе подолг период ги развиваат билатералните односи во рамките на формално воспоставено стратешко партнерство. Таквата рамка создава механизам за долгорочна соработка во повеќе области – од економијата и трговијата, преку инфраструктурата и енергетиката, до образованието, културата и безбедноста. Токму затоа секој нов форум, секоја нова инвестиција или нов деловен договор не претставува изолиран настан, туку дел од поширока политика на продлабочување на односите. Особено е значајно што Македонија ваков степен на институционализирано партнерство има со релативно мал број држави. Тоа покажува дека Анкара ја препознава Македонија како важен фактор на Балканот, додека Скопје гледа во Турција партнер со значително економско и политичко влијание во регионот и пошироко.
Стратешкото партнерство добива дополнителна тежина ако се има предвид фактот дека Турција е една од најголемите економии во Европа и Азија, земја со силна индустриска база, развиен извозен потенцијал и компании присутни на глобалните пазари. За Македонија, тоа претставува можност не само за привлекување капитал туку и за интегрирање во пошироки производствени и логистички синџири.
Пораките што беа испратени од Истанбул имаат многу пошироко значење од дневнополитичката агенда
Кога премиерот Христијан Мицкоски зборува за нов инвестициски циклус, а министрите ја потенцираат економската дипломатија како клучна алатка на надворешната политика, тие практично ја потврдуваат определбата Македонија да го користи стратешкото партнерство како инструмент за забрзан економски развој. Во современиот свет се успешни токму државите што успеваат политичките односи да ги претворат во економска добивка. Македонско-турските односи денес се движат токму во таа насока. Изградената доверба создава стабилна основа врз која може да се градат нови инвестиции, да се отвораат работни места и да се генерира економски раст.
Оттука, форумот во Истанбул не треба да се гледа само како уште еден дипломатски или бизнис-настан. Тој е логично продолжение на еден подолг процес во кој стратешкото партнерство постепено се претвора во конкретна развојна платформа. А токму тоа е најголемата вредност на современите билатерални односи имено кога политичката доверба станува економска можност, а партнерството се претвора во двигател на развојот.
