Од 9 до 15 ноември, во 46-тата недела од годинава, во земјава се пријавени 154 случаи на грип и заболувања слични на грип. Тоа е за 37,5 отсто повеќе од претходната недела, кога биле пријавени 112 случаи. Во истата недела од минатата сезона биле регистрирани 117 случаи, што значи дека годинава бројот е повисок за 31,6 отсто. Во споредба со моделот за последните 16 сезони, зголемувањето изнесува 73,2 отсто, се наведува во извештајот на Институтот за јавно здравје (ИЈЗ).
Најмногу случаи се пријавени во Тетово (49), Скопје (38) и Куманово (19). Во Радовиш се пријавени 12 случаи, во Велес осум, во Гостивар седум, во Прилеп пет и во Струмица три. По два случаја се регистрирани во Ресен, Неготино, Охрид и Штип, а по еден во Гевгелија и Македонски Брод.
Според возраста, 102 случаја се регистрирани кај лица од 15 до 64 години, 22 кај лица постари од 65 години, 16 кај деца до четиригодишна возраст и 14 кај деца од 5 до 14 години. За првпат оваа сезона е надминат прагот од 7,32 случаи на 100.000 жители, со што е достигнат епидемиолошкиот праг за почеток на сезоната на грип. Активноста на грипот на национално ниво е оценета како ниска.
Во текот на 46-тата извештајна недела, во вирусолошката лабораторија на ИЈЗ биле доставени 64 примероци од рутинскиот надзор за тестирање на грип, SARS-CoV-2 и/или респираторен синцицијален вирус (RSV). Четири примероци биле позитивни на грип. Кај три е утврден вирус на грип од типот А, без определен подтип, а кај еден е утврден подтипот A(H3). Регистрирани се и три позитивни резултати за SARS-CoV-2.
Од почетокот на сезоната 2026/2027 се пријавени вкупно 609 случаи на грип и заболувања слични на грип, односно 33,2 на 100.000 жители. Бројот е за 6,7 отсто повисок од истиот период минатата сезона, кога биле пријавени 571 случај, и за 30,8 отсто повисок во однос на моделот за последните 16 сезони.
Случаите се пријавени преку 19 центри за јавно здравје и подрачни единици. На подрачјето на Тетово се регистрирани најмногу случаи (198) и највисока инциденца од почетокот на сезоната (118,6 на 100.000 жители). Најголем број случаи се пријавени кај лицата на возраст од 15 до 64 години, вкупно 438, или 71,9 отсто од сите пријавени случаи.
Од ИЈЗ посочуваат дека вакцинацијата е најефикасната заштита од сезонски грип, особено за лицата од ризичните групи. Меѓу нив се лицата постари од 65 години, децата на возраст од 6 до 59 месеци, лицата постари од шест месеци со хронични заболувања, бремените жени и здравствените работници.
Вакцинацијата во земјава почна на 21 октомври и се спроведува во центрите за јавно здравје и нивните подрачни единици или во здравствените домови. Здравствените работници од Скопје се вакцинираат во ИЈЗ. Термин за бесплатна вакцина може да се закаже преку vakcinacija.mk.
Според податоците на Управата за електронско здравство, до изготвувањето на извештајот со бесплатна вакцина биле вакцинирани вкупно 25.458 лица од ризичните групи.


































