Министерството за внатрешна безбедност на САД извршило 980.000 депортации во првите 18 месеци од вториот мандат на претседателот Доналд Трамп, јавија американски медиуми, повикувајќи се на извештај објавен од Институтот за миграциска политика. Само 20 отсто од сите депортирани лица во тој период биле лица со кривични пресуди, се вели во извештајот. Меѓу депортираните имигранти кои живееле во САД две или повеќе години, 71 отсто од нив немале кривични пресуди.
Извештајот е напишан од Марк Розенблум, поранешен раководител на Бирото за статистика на Министерството за внатрешна безбедност.
На годишно ниво, вкупниот број на депортации е поголем отколку за време на администрацијата на поранешниот претседател Џо Бајден и за време на првиот мандат на Трамп.
Од 980.000 депортации извршени од Службата за имиграција и царина и гранична заштита на САД за време на вториот мандат на Трамп, околу 59 отсто, или 580.000 случаи, биле присилни депортации. Околу 30 отсто, или околу 300.000 случаи, биле враќања според постапките за спроведување, а 11 отсто, или околу 110.000 случаи, биле административни враќања.
Стејт департментот во вторникот соопшти дека администрацијата на Трамп анулирала повеќе од 300.000 американски визи за време на неговиот втор мандат.
