Министерот за надворешни работи и надворешна трговија, Тимчо Муцунски, официјалната посета на Државата Катар ја заокружи со две деловни средби, со извршните директори на „Катар Ервејс“ (Qatar Airways) и „Барзан Холдингс“ (Barzan Holdings).
На средбата со раководството на „Катар Ервејс“, една од водечките светски авиокомпании, министерот Муцунски ја претстави инвестициската отвореност на Владата, а се разговараше и за можностите за воспоставување директна авионска линија меѓу Скопје и Доха, соопшти МНРиНТ.
Соговорниците се согласија дека подобрата авиоповрзаност ќе придонесе за развојот на туризмот, трговската размена, бизнис-контактите и мобилноста на граѓаните, како и за дополнително унапредување на економската и културната соработка меѓу двете земји.
На средбата со „Барзан Холдингс“ беа разгледани можностите за соработка во областа на одбранбената индустрија и безбедносните технологии, како и за размена на искуства во развојот на одбранбените капацитети, модернизацијата и зајакнувањето на институционалната отпорност.
Посетата на Муцунски на Катар е во рамки на напорите за привлекување нови инвестиции, поттикнување на извозот и продлабочување на економската и трговската соработкa.
