На денешното рочиште за пожарот во дискотеката „Пулс“ Кочани, Обвинителството презентираше медицинска документација и податоци за повредените лица кои побарале медицинска помош по трагедијата во која загинаа 63 лица, а над 200 беа повредени.
Во судницата во затворот во Идризово, јавната обвинителка Наташа Сарамандова ги презентираше вештачењата поврзани со повредите на жртвите.
Според презентираните податоци, 157 лица се здобиле со тешки телесни повреди, додека 65 лица имаат полесни телесни повреди. Меѓу повредените има и околу 20 деца, пренесе МИА.
Судењето се однесува на еден од најтешките трагични настани во поновата историја, при што се утврдува обемот на последиците и степенот на повредите кај преживеаните.
Вештачењата на медицинската документација на повредените во пожарот на 16 март 2025 година констатира повреди од штетни гасови и интоксикација, тешки телесни повреди со изгореници на лицето, рацете, телото и грбот од 6 до 30 % од вкупната површина на телото, како и изгореници на дишните органи, оштетување на респираторната функција и повреда на дишните органи поради вдишување јаглероден моноксид.
Некои од повредените добиле и нагмечувања на главата и телото, скршени ребра и инхалаторни повреди оиради што била неопходна механичка инхалација, пад на кислородната сатурација до 80 %, нагмечни рани на рацете и телото, на очите и оштетувања и скршеници на градните прешлени.
Одбраната реагира на изведувањето на доказите дека е само читање на листата со докази, а не читање и изведување докази.
Претходно, Обвинителството ги изведе обдукциските наоди и мислења од Институтот за судска медицина за причините на смртта на жртвите.
Обдукцијата на 59 жртви на пожарот во дискотеката „Пулс“ во Кочани покажува дека нивната смрт е насилна и настапила како резултат од труење со јаглероден моноксид.
Кај пет од жртвите обдукциското мислење од Институтот за судска медицина исто така констатира насилна смрт, но која настапила од задушување од притисок врз градниот кош или како резултат на недостиг на воздух и кислород во околната средина. Обдукцијата на три од жртвите што почнале во текот на лекувањето исто така констатира насилна смрт, која настапила поради акутна слабост на белите дробови од интоксикација од јаглероден моноксид, а кај еден поради изгореници од трет степен на главата и телото.
Обвинителството изведе и писмен одговор од Судска медицина, за кој, рече, содржи одговори на прашањата колкаво присуство во крвта е смртоносно и колку бргу настапува смрт при задушување со јаглероден моноксид, потоа кои се специфични и неспецифични индикации и која е разликата меѓу задушување и труење со јаглероден моноксид, како и дали би биле спасени доколу биле подложени на кислородна терапија на местото на настанот и во болниците.
Обвинителството исто така предложи на следното рочиште да биде повикано и сослушано вешто лице, кое ќе даде одговор на сите дополнителни прашања што произлегле или произлегуваат од обдукциското мислење.
Судот на почетокот на денешното рочиште информира дека сè уште нема повратна информација за достапноста на едниот сведок, а за другите двајца сè уште не е завршено вештачењето за нивната подготвеност да сведочат по што одлучи да се продолжи со изведување материјални докази.
Судењето продолжува на 4 мај за кога Обвинителството треба да го повика и вештото лице од Судска медицина.
Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на земјата. Судењето го води судијката Дијана Груевска-Илиевска, а обвинението го застапува тим од 15 јавни обвинители.
