Лидерот на грузиската опозициска Граѓанска партија, Александар Елисашвили, денеска е уапсен под сомнение за обид за палење на зградата на Градскиот суд во Тбилиси – објави Министерството за внатрешни работи.
Во соопштението на министерството на Фејсбук се вели дека Елисашвили рано утринава со чекан скршил прозорец од зградата на судот, потоа влегол во една од канцелариите на судот во Тбилиси и истурил бензин околу неа.
Според истрагата, тој со чекан го скршил стаклото од надворешниот дел на зградата на Градскиот суд во Тбилиси, влегол во зградата маскиран, со бензин ја полеал канцелариската опрема и документација и се обидел да ги запали. Тој бил приведен „на местото на настанот од страна на претставници на судската полиција, на кои Елисашвили им се спротивставил, користејќи огнено оружје што го имал и прибегнал кон физичко насилство“ – додаде Министерството за внатрешни работи.
Еден од полицајците бил повреден и однесен во болница, а и самиот Елисашвили бил повреден за време на притворањето. Неговото оружје било запленето од полицијата како материјален доказ.
Четириесет и седумгодишниот Елисашвили е основач на Граѓанската партија, која е дел од коалицијата „Силна Грузија – Лело“, една од трите главни опозициски партии во Грузија. Тие се соочуваат со закана да бидат забранети од владејачката партија Грузиски сон, која изјави дека наскоро ќе го упати прашањето до Уставниот суд, забележаат американските медиуми.
Владејачката партија „Грузиски сон“ поднесе барање до Уставниот суд за забрана на трите главни опозициски партиски коалиции, додека неколку опозициски политичари веќе се во притвор, во егзил или се соочуваат со кривични обвиненија, за кои се сомнева дека се политички мотивирани.
Елисашвили беше уапсен ден по протестот што се одржа во Тбилиси по повод една година од митинзите против одлуката на владата да ги суспендира преговорите за членство во Европската унија (ЕУ).
Партијата „Грузиски сон“ се обиде да го ограничи движењето со заострување на правилата за јавни собири, како и со донесување низа закони насочени кон групите за човекови права, невладините организации и независните медиуми.
