Повод: Последните изјави на американската амбасадорка Анџела Агелер и духот на стратегиското партнерство помеѓу Македонија и САД
- Последните изјави на американската амбасадорка во земјава Анџела Агелер одат токму во полза на размислувањата за суверено носење одлуки, покажувајќи доследност на политиките и ставовите на САД во однос на прашањето за уставните измени. При гостување на ТВ21 неделава, Агелер изрази уверување дека работата на уставните измени се одвива активно и дека се водат разговори што го поплочуваат патот за почеток на процесот
Континуираната поддршка од стратешкиот партнер САД да се работи на внатрешни промени со кои би се овозможил напредок во евроинтеграциите на Македонија добива различни толкувања во домашната јавност, особено бидејќи е во контекст на спроведување на уставните измени и активирање на преговарачката рамка со Европската Унија. Но, во широка консултација на редакцијата на „Нова Македонија“ со уставни експерти, универзитетски професори и дипломати, може да се согледа нејзиното подлабоко значење, препознавајќи еден пристап на суверено, сопствено одлучување за уставните измени врз основа на решение што би ги задоволило сите страни, за што нашиот весник пишуваше во повеќе наврати.
Последните изјави на американската амбасадорка во земјава Анџела Агелер одат токму во полза на таквите размислувања, покажувајќи доследност на политиките и ставовите на САД во однос на прашањето за уставните измени. При гостување на ТВ21 неделава, Агелер изрази уверување дека работата на уставните измени се одвива активно и дека се водат разговори што го поплочуваат патот за почеток на процесот.
– Сто проценти сум сигурна дека се работи на уставните измени. Ме охрабрува тоа што гледам дека активно разговараат за почнување на процесот. За членство во ЕУ, мора да се испочитуваат процесите – порача дипломатската претставничка на САД.
За потсетување, во февруари минатата година Агелер исто така се осврна на уставните измени во исклучително коректна изјава, изнесувајќи став дека стратегиското партнерство на Македонија со САД не се доведува во прашање од (не)спроведувањето на уставните измени.
– Нашето партнерство е стратегиско и не зависи од тоа. Дали ќе бидеме разочарани? Апсолутно. Но, партнерството што го имаме со Македонија е нешто што трае уште од независноста на земјава и тоа ќе продолжи. Вие сте НАТО-сојузник, а тоа не се менува, така што таа врска е силна и ви ветувам дека правиме сѐ што е во наша моќ овде, во Амбасадата на САД, секој ден, да ѝ помогнеме на земјава да ги исполни своите европски аспирации – изјави амбасадорката на САД.
Таа тогаш категорично ги отфрли сценаријата за загрозеност на стратегиското партнерство, па и евентуални „безбедносни интервенции“ за негово зачувување. Исто така, треба да се потсети на ставот на Агелер во кој таа нагласи дека планот за евроинтегративниот пат на државата треба да биде споделен со македонските граѓани и тие да ги слушнат деталите на секој план што би ги решил тековните проблематични прашања со другите земји.
И на почетокот на 2024 година, како и сега, наши соговорници упатени во актуелните политички состојби изразија уверување дека ставовите на САД пренесени од амбасадорката Агелер претставуваат своевиден сигнал дека доколку во Македонија се појави политички субјект што инсистира на сувереност во одлуките од национален интерес, а притоа не ги загрозува партнерскиот однос и геостратегиските интереси на поширокото партнерство, тоа е прифатливо за Америка. Од друга страна, пак, се смета дека беспоговорно прифаќање политички решенија што ги загрозуваат македонските национални интереси никако не им оди во прилог ниту на геостратегиските интереси на САД.
Извесно е дека САД се свесни и дека во големо мнозинство е изразен отпорот на јавноста за бараните уставни измени, како услов-уцена за почеток на преговорите со ЕУ, односно го имаат предвид при внимателно конципираните педантни изјави, за разлика од лидерите од Европската Унија, кои упорно изнесуваат тврди барања и условувања, не оставајќи можност за компромис. Р.Н.М.
Американско-македонските односи се засноваат врз длабоки вредносни принципи
Целта на САД е Македонија да биде „побезбедна,
посилна и посигурна држава со стабилна демократија“
Во интервјуто на ТВ21, американската амбасадорка Анџела Агелер зборуваше и за основите на партнерството меѓу САД и Македонија, истакнувајќи дека односите не се базираат само на геополитички интереси туку и на длабоки вредносни принципи. Првата и најважна заедничка вредност е вербата во демократијата, а втората е економскиот развој, кој носи сигурност и за македонските граѓани, но и за американските партнери.
– Силна економија во С. Македонија значи сигурност и за САД – истакна Агелер, додавајќи дека безбедносното партнерство е третиот столб на заедничките интереси.
Таа посочи дека членството во НАТО е „огромно достигнување“ и дека земјата е важен сојузник во јакнењето на трансатлантските и европските односи.
Амбасадорката зборуваше и за состојбата во судството, наведувајќи дека политичкото влијание е присутно, но дека е оптимистка оти ќе дојдат луѓе со добра волја што нема да потпаднат под притисок. Таа наведе дека САД инвестирале „половина милијарда евра“ во судството, но дека резултатите не се на очекуваното ниво.
Амбасадорката заклучи дека целта на САД е Македонија да биде „побезбедна, посилна и посигурна држава со стабилна демократија“, истовремено охрабрувајќи ги институциите да бидат двигател на реформите наместо политичките препукувања. Р.Н.М.
Амбасадорката Агелер изразува задоволство од напредокот на
градежните работи на коридорите 8 и 10
Стратешки важните коридори ќе ја зајакнат безбедноста и ќе ја поттикнат трговијата
Американската амбасадорка Анџела Агелер, во разговор за ТВ21, изрази големо задоволство од напредокот на градежните работи на коридорите 8 и 10, кои ги изведува конзорциумот „Бехтел и Енка“.
– Особено сум задоволна од коридорот 8, не само затоа што на него работи врвна американска компанија, туку и затоа што од гледна точка на НАТО и стратегиската сигурност, тие коридори се клучни – рече Агелер, додавајќи дека и коридорот 10 има стратешко значење за економијата и безбедноста на земјата.
Таа нагласи дека коридорите не само што ја зајакнуваат безбедноста на државата туку значително ќе ја поттикнат и трговијата.
– Едвај чекам да завршат патиштата и тунелите, за да ги пробам лично – со насмевка кажа Агелер.
Амбасадорката ја поздрави и соработката меѓу македонскиот и бугарскиот министер за транспорт, оценувајќи го договорот како „исклучително важен“ и честитајќи им за храброста во постигнувањето на заедничкиот интерес.
Министерот за европски прашања Орхан Муртезани за можен трет протокол со Софија:
Нашите грижи и дилеми не се соодветно адресирани
Министерот за европски прашања Орхан Муртезани вчера изјави дека по локалните избори, заедно со меѓународните партнери, се работи на воспоставување дијалог и враќање на довербата меѓу Скопје и Софија, со цел да се надмине спорот и да се одблокира евроинтегративниот процес на земјава.
– Тоа што се работи константно по локалните избори заедно со нашите европски партнери е воспоставување на дијалогот и враќање на довербата, бидејќи без дијалог и доверба не може да стане збор за надминување на проблемот. Во моментов се прават напори за воспоставување дијалог и градење доверба, а потоа ќе стане збор и за можните начини за надминување на проблемот – истакна Муртезани на прес-конференција во Скопје со министерката за европски прашања Јесика Розенкранц.
Одговарајќи на новинарско прашање во однос на изјавата на американската амбасадорка Анџела Агелер во интервју за ТВ21 дека е убедена оти се работи на прашањето за уставните измени, за да појасни дали навистина е така, Муртезани рече дека „секако дека на тоа се работи, бидејќи тоа е преземена обврска“, но додаде дека „во моментов не може да се говори за процесот на измени на Уставот, бидејќи сите наши грижи и дилеми не се соодветно адресирани“.
– Секако дека на уставните измени мора да се работи. Тоа е преземена обврска без која нема преговори и нема членство во ЕУ, меѓутоа, како што нагласив, во моментов не може ние да зборуваме за процесот на уставни измени кога сите тие наши грижи и дилеми не се соодветно адресирани, а за да бидат адресирани треба да се воспостави редовен дијалог, да се врати довербата меѓу двете соседни земји за да можеме на европски начин да градиме заедничка европска иднина – рече министерот за европски прашања. Р.Н.М.
