Како се појави генерациската поделба
Некогаш генерациите беа поделени со војни, револуции или големи миграции – сега се чини дека се поделени со мемиња, апликации и ставови кон работата од девет до пет. Современите генерациски поделби како бејби бумери, генерација икс, милениумци и генерација зед станаа дел од секојдневниот говор, но ретко се прашуваме од каде всушност доаѓаат овие етикети и за што служат. Дали тие се одраз на вистински културни и технолошки промени – или можеби се вештачки наметнати модели што повеќе разделуваат отколку што обединуваат?
На која генерација ѝ припаѓате?
Сè поголем број социолози и критичари предупредуваат дека ваквите генерациски етикети не се само безопасни кратенки туку можат да бидат и политичка алатка – начин да се фокусира вниманието на јавноста врз разликите меѓу возрасните групи наместо врз подлабоките системски нееднаквости како што се економските, социјалните или класните. Додека некои ги гледаат генерациите како клуч за разбирање на современата култура, други ги гледаат како завеса од чад – модерен мит што ги обликува идентитетите според датумот на раѓање, а не според искуството од реалниот живот.
На која генерација ѝ припаѓате? Модерната поделба на генерации, исто така, предизвика одредена конфузија, особено кај постарите лица, кои не разбираат зошто воопшто постојат поделби меѓу луѓето родени во истиот период од историјата.
Првата категоризирана генерација беше генерацијата ровови, која порасна за време на Првата светска војна. Потоа следуваше генерацијата на Големата депресија, која стана полнолетна во 1929 година, воената генерација, родена помеѓу 1922 и 1927 година, која порасна за време на Втората светска војна, и повоената (тивка) генерација, родена помеѓу 1928 и 1945 година, која порасна за време на Студената војна. Кога заврши Втората светска војна, започна бејби бумот во 1945 година. Иако овој период на експлозивни раѓања траеше до 1965 година, генерацијата наречена бејби бумери или бумери 1 ги вклучува оние родени помеѓу 1945 и 1955 година. Генерацијата што созреа во оваа деценија беше најпогодена од просперитетот што се појави по војната и беше пречекана со многу подобар живот, потрошувачко општество и многу повеќе пари потрошени за храна, облека и патување.
Бумерите ја дочекуваат староста во помалку сигурни финансиски околности, па затоа прашањето за пензионирање е една од грижите што ги мачи. Во многу земји, должината на работниот стаж е продолжена токму поради растечкиот број на ова население што треба да добие пензија. Најголемиот трошок на оваа генерација е обезбедување високо образование за нивните потомци, па затоа тие се меѓу генерацијата со најголем долг за студентски кредити (плаќајќи ги за нивните милениумски деца). Членовите на оваа генерација се посклони кон традиционалните медиуми, а според некои статистики, дури 90 проценти од бумерите користат Фејсбук.
Генерацијата што порасна со Ем-ти-ви
Кога се споменуваат бумерите, се мисли на привилегирана генерација што купувала куќи, викендички и автомобили и имала обезбедени работни места и станови до крајот на својот живот.
Бидејќи ова не важи за целата генерација бумери, во демографската група има и бумери 2, родени помеѓу 1955 и 1965 година, кои „доцнеле“ за подобри времиња и пораснале на време за ширењето на сидата. Генерацијата икс се однесува на оние родени помеѓу 1965 и 1980 година. Демографите ги сметаат за генерација на нови музички трендови. Во текот на 1990-тите, членовите на оваа група се дефинираа себеси како „нефокусирани дваесетгодишници“, без цел, неподготвени да пораснат.
На оваа генерација, која порасна со Ем-ти-ви, ѝ се припишуваат намалени очекувања, во споредба со бумерите, кои пораснаа верувајќи дека сè е можно. Оваа генерација созреа помеѓу 1986 и 1996 година, среде војна, економски колапс, експанзија на криминалот и општа безнадежност, па тие имаат високо ниво на склоност да ги земат работите во свои раце, што го направија преку криминал, шверц, бизниси (оваа генерација има голем број претприемачи низ целиот свет) и протести.
Оние што се родени помеѓу 1981 и 1996 година спаѓаат во категоријата милениумци. Терминот првично се поврзуваше со оние што завршиле средно училиште околу 2000 година. Еден од дефинирачките настани на оваа генерација се глобалната финансиска криза (2007-2008) и нејзините последици, кои ги погодија милениумците токму кога ги започнуваа своите кариери. Тие најчесто се деца на бумерите 1 и 2.
