Тајландската премиерка Паетонгтарн Шинаватра беше принудена да поднесе оставка само една година откако ја презеде функцијата, поради пресуда на Уставниот суд.
Судот, чија одлука беше пренесувана во живо, оцени дека 39-годишната премиерка ги прекршила етичките принципи во телефонски разговор што протече во јавноста и ја суспендираше уште во јули.
Со неа мора да поднесе оставка и целата влада, која до избор на нов премиер ќе продолжи да работи во технички мандат.
Како вршител на должност е назначен заменик-премиерот Фумтам Вечајачај. Не е извесно дали новиот премиер повторно ќе дојде од редовите на партијата Пхеу Тај, која ја предводи Шинаватра.
Случајот се однесува на аудио-снимка од разговор меѓу Шинаватра и поранешниот камбоџански лидер и актуелен претседател на Сенатот, Хун Сен. Таа во разговорот, кој се однесувал на граничен спор, нарекла висок воен офицер „противник“, а Хун Сен – близок пријател на нејзиното семејство – го ословила со „вујко“.
Овие зборови предизвикаа силни реакции и протести во Тајланд.
