Американскиот претседател Доналд Трамп го исполни ветувањето дека ќе воведе царини од 25 отсто на увоз на челик и алуминиум, засилувајќи ја долго ветената трговска војна.
Трамп потпиша две извршни наредби со кои се укинуваат исклучоците и ослободувањата од неговите царини за челик во 2018 година. Предвидено е наредбите да стапат на сила во март.
-Ова е голема работа, на ваков начин Америка повторно ќе се збогати – истакна американскиот претседател.
Трамп посочи дека размислува за воведување дополнителни царини за автомобили, лекови и компјутерски чипови.
Тој го оправда можното ослободување на Австралија од царините со трговски суфицит на САД со земјата.
-А причината е што купуваат многу авиони. Тие се прилично далеку и им требаат многу авиони – рече Трамп.
Американскиот претседател претходно ги најави царините.
По најавата на Трамп, Европската унија предупреди од воведување на царините.
-ЕУ не гледа оправдување за воведување царини на нејзиниот извоз – соопшти во Брисел Комисијата на ЕУ, која е одговорна за трговската политика.
Комисијата под раководство на Урсула фон дер Лајен, нагласи дека од перспектива на ЕУ, воведувањето царини би било „незаконско“ и „економски контрапродуктивно“.
Во неговиот прв мандат до 2021 година, Трамп исто така воведе дополнителни даноци за челик и алуминиум. ЕУ, од своја страна, одговори со царини за избрани американски производи, како фармерки, виски и мотоцикли.
