На светската листа и понатаму доминираат поранешните светски прваци, Магнус Карлсен (мажи) и Јифан Хоу (жени)
ШАХ – НОЕМВРИСКА РЕЈТИНГ-ЛИСТА НА ФИДЕ
Светската шаховска федерација (ФИДЕ) ја објави најновата рејтинг-листа за ноември, а на македонската машка листа велемајсторот (ВМ) Евгени Романов и понатаму е прв, сега со нови четири рејтинг-поени (р.п.) во однос на октомври (вкупно 2.584). Втор е ВМ Трајко Недев (2.475), а трет ИМ Дејан Стојановски (2.426). Од петтото на четвртото место се искачи ИМ Филип Панчевски (2.420) со нови 10 р.п., а за една позиција падна ВМ Александар Чоловиќ (2.413), и сега е петти. Најмногу рејтинг-поени, 22, освои првиот македонски ВМ, Никола Митков (2.368), кој од 12-то се искачи на 11-то место. Вкупно 10 македонски шахисти од стоте имаа пораст, а тројца пад на сопствениот рејтинг.
На македонската женска рејтинг-листа, прва е ЖФМ Моника Стојковска (2.067), а потоа се ЖФМ Весна Секуловска (2.064), ЖФМ Ивана Манова (2.059), ЖИМ Габриела Коскоска (2.000), Моника Жежовска (1.981)…, меѓу 41 шахистка. Само Жежовска и Катерина Петровска имаат промени во рејтингот во однос на октомври.
На светската листа на врвот и понатаму доминира некогашниот светски првак, Норвежанецот Магнус Карлсен (2.831). Од четвртата на втората позиција се искачи Американецот Фабијано Каруана (2.805) со девет нови рејтинг-поени. Од второто на третото место падна Американецот Хикару Накамура (2.802), а од третото на четвртото, прворангираниот Индиец, Арјун Еригаиси (2.759) иако освои два рејтинг-поена. Претендентот за светски првак, Индиецот Домарају Гукеш остана петти (2.783), а актуелниот светски првак, Кинезот Динг Лирен (2.728) сега е 23-ти. Кај шахистките на врвот и понатаму е поранешната светска првенка Јифан Хоу (2.633), актуелната Ју Венјун е втора (2.563), а Тан Жонгји е трета (2.551), сите од Кина, но со исти рејтинзи како минатиот месец.
Екипно, меѓу 203 федерации, Македонија, мажи, напредуваше за две места и сега е 55-та, со нови пет рејтинг-поени (2.428, просечен рејтинг на првите 10 шахисти). Водат САД (2.732), пред Индија (2.721) и Кина (2.677). Македонија, жени, од 61-то падна на 63-то место (1.965), прва е Кина (2.487), пред Индија (2.416), Украина (2.388), итн. Г.И.
ВРВНИ ПЕТ МАКЕДОНСКИ ШАХИСТИ
ВМ Евгени Романов 2.584
ВМ Трајко Недев 2.475
ИМ Дејан Стојановски 2.426
ИМ Филип Панчевски 2.420
ВМ Александар Чоловиќ 2.413
ВРВНИ ПЕТ МАКЕДОНСКИ ШАХИСТКИ
ЖФМ Моника Стојковска 2.067
ЖФМ Весна Секуловска 2.064
Ивана Манова 2.059
ЖИМ Габриела Коскоска 2.000
Моника Жежовска 1.981
ВРВНИ ПЕТ СВЕТСКИ ШАХИСТИ
Магнус Карлсен 2.831
Фабијано Каруана 2.805
Хикару Накамура 2.802
Арјун Еригаиси 2.799
Домарају Гукеш 2.783
ВРВНИ ПЕТ СВЕТСКИ ШАХИСТКИ
Јифан Хоу 2.633
Венјун Ју 2.563
Тан Жонгји 2.551
Леи Тингџие 2.549
Химпи Конеру 2.530
