Според истражувањето објавено во списанието „Тера нова“, најновиот бран на вулкански ерупции на Исланд може да потрае со децении, па дури и со векови. Серијата ерупции започнаа во 2021 година на полуостровот Рејкјанес во југозападниот дел на островот, само 55 километри југозападно од главниот град Рејкјавик. Голем дел од населението на островот во Северниот Атлантик живее во погодениот регион. Во него се наоѓаат и единствениот меѓународен аеродром и неколку геотермални централи што ја снабдуваат земјата со топла вода и електрична енергија.
Само од минатиот декември досега се случија пет големи вулкански ерупции. Лава се излеа од пукнатините на земјата и проголта некои куќи. Истражувачите ги анализираа податоците за земјотресите во изминатите три години и ги споредија хемиските и физичките својства на лавата од различни локации за да утврдат дали потекнува од истата подземна комора на магма. Тие открија дека навистина се работи за магма со слични петрографски својства. Ова укажува на поврзан подземен систем на магма, напишаа истражувачите. Врз основа на сеизмолошките податоци, тие веруваат дека се работи за умерено голема акумулација на магма на длабочина од приближно девет до 11 километри, која е долга 10 километри. Комората е создадена помеѓу 2002 и 2020 година.
Тимот истражувачи заклучи дека сегашната серија на ерупции би можела да биде почеток на долготрајна епизода, но тие не можат да предвидат колку долго ќе трае. Исланд се наоѓа на местото каде што се раздвојуваат северноамериканските и евроазиските тектонски плочи. Затоа, вулканските ерупции се чести, но ерупциите на вулканите поблиску до центарот на островот обично траат по неколку дена или недели. Ерупциите од пукнатините, од друга страна, може да траат многу подолго.
