РЕВОЛУЦИОНЕРНА ТЕХНОЛОГИЈА
Раното откривање пијани возачи е клучно за безбедноста на патиштата, а новиот систем развиен од научниците од Универзитетот „Едит Кауан“ во Австралија има цел да ги забележи возачите што консумирале алкохол пред да седнат зад воланот. Оваа иновативна технологија за следење на лицата може да го револуционизира начинот на кој се спречува возењето во пијана состојба. Многу сегашни системи откриваат интоксикација само со анализа на состојбата на возачите, дозволувајќи ризик пред да се соберат податоците.
За разлика од постојните експериментални поставки, кои се потпираат на специјализирана опрема како што се миниалкотестатори или седишта со сензор за притисок, овој нов систем користи конвенционален и достапен хардвер.
Ветувачки резултати
Истражувачкиот тим, предводен од компјутерскиот научник Сајед Зулкарнаин Гилани, се обиде да ги надмине овие ограничувања. Тие спровеле студија со 60 доброволци што возеле во затворен симулатор со три нивоа на интоксикација: трезвено, ниско и високо. Користејќи обична РГБ-видеокамера, тие го снимиле лицето на секој возач и примениле алгоритам за машински да ја анализираат снимката. Алгоритамот ги идентификувал постојаните движења на лицето, насоката на погледот и положбата на главата како основни индикатори за интоксикација.
Резултатите се ветувачки, системот постигнал 75 отсто точност во одредувањето на нивото на алкохол кај возачите. Истражувачите веруваат дека оваа стапка на точност ќе се подобри со понатамошен развој на технологијата, како што е дополнителна обука на алгоритамот за собирање поголем сет податоци.
Можните примени на оваа технологија се протегаат надвор од сообраќајот. Таа може да се приспособи во апликација за паметните телефони, дозволувајќи им на поединците да се самооценуваат или да ги проверуваат сопатниците. Гилани, исто така, предвидува употреба на технологијата во надзорните камери што ќе ѝ помогне на полицијата во спроведување на законот и спречување на возењето во алкохолизирана состојба.
Безбедност во сообраќајот
– Ова истражување потврдува дека е можно да се открие нивото на интоксикација само со една едноставна камера. Следниот чекор во нашето истражување е да ја дефинираме резолуцијата на сликата потребна за користење на овој алгоритам – вели Гилани.
Доколку видеата со ниска резолуција се покажат доволни, оваа технологија би можела да ја користат камерите за надзор покрај патиштата. На Зимската конференција за апликации на компјутерска визија неодамна беше презентиран труд со детали за ова истражување, истакнувајќи го потенцијалното влијание на ова откритие врз безбедноста на патиштата и врз спроведувањето на законот.
