Поранешниот претседател на Советот на јавните обвинители, Антонио Јолевски, е назначен за вршител на должноста виш јавен обвинител во Битола, на местото на Пецо Везировски, против кого е поведена постапка под сомнение за примање награда за противзаконито влијание.
Одлуката е донесена на 53. седница на Советот на јавните обвинители, одржана на 13 октомври, откако Основниот кривичен суд Скопје го известил Советот дека на Везировски му се определени мерки за претпазливост, меѓу кои и забрана за преземање определени работни активности поврзани со кривичното дело.
– Поради ваквата состојба, Советот одлучи да донесе одлука за назначување на јавниот обвинител од Вишото јавно обвинителство Битола, Антонио Јолевски, за в.д. виш јавен обвинител на Вишото јавно обвинителство Битола – се наведува во соопштението на Советот.
Основното јавно обвинителство за гонење организиран криминал и корупција на 7 октомври информираше дека е поведена постапка против виш јавен обвинител во Вишото јавно обвинителство Битола поради основано сомнение за сторено кривично дело примање награда за противзаконито влијание, предвидено во член 359 став 3 во врска со став 2 од Кривичниот законик.
Според Обвинителството, во текот на претходниот период, преку повеќе дејства и примена на посебни истражни мерки, биле обезбедени докази што упатуваат на сомнение дека Везировски го искористил своето реално влијание и службената положба за недозволено да влијае врз одлучувањето на колеги јавни обвинители и судии во најмалку четири одделни предмети на подрачјето на кое ја вршел функцијата.
– Притоа ургирал за пониски казни или за да обезбеди поповолна позиција за осомничени или обвинети лица во кривична постапка – соопштија од Обвинителството.
Судија на претходна постапка при Основниот кривичен суд Скопје, постапувајќи по предлог на ОЈО ГОКК и по сослушување на осомничениот во присуство на бранител, го прифатил предлогот за определување мерки за претпазливост.
На Везировски му се одземени патната исправа и му е забрането да презема определени работни активности. Против решението странките имаат право на жалба пред Кривичниот совет на Основниот кривичен суд Скопје.
