Квалитетната содржина, добрата оптимизација и добро осмислената инвестиција во промоција прават чуда за нашата онлајн видливост. Издвојуваме како може да се зголеми бројот на посетители на една веб-страница.
Водени од најдобрите практики на дигиталниот маркетинг, создаваме онлајн база на податоци – веб-страница со нашите контакт-информации, производи и услуги, како и соодветна содржина. Но што сега? Само затоа што страницата постои не значи дека луѓето ќе ја посетат. Една од најголемите придобивки на веб-сообраќајот е тоа што помага да се зголеми свеста за нашата компанија или бренд. Кога луѓето ја посетуваат нашата веб-локација, тие се запознаваат со нашиот бизнис и поверојатно е дека ќе го запаметат во иднина, што ќе доведе до поголемо препознавање. Штом потенцијалните клиенти ќе ја посетат нашата веб-страница, ние мора да направиме сѐ што можеме за да ги претвориме во клиенти што плаќаат и се лојални следбеници на нашиот бизнис.
Едно од најчестите прашања од сопствениците на мали бизниси и занаети е поврзано со зголемување на посетите на веб-страницата на нивниот онлајн бизнис. Што да направите за да ги зголемите сообраќајот и конверзиите на веб-страницата? Со анализа на сообраќајот на веб-страниците, можеме да стекнеме увид во однесувањето, преференците и потребите на нашата публика, што ни помага да донесуваме информирани одлуки за маркетинг-стратегии и понуди на производи.
Кои се клучните метрики за следење на успехот на веб-страницата? При мерење на веб-сообраќајот, постојат неколку важни метрики за следење – како што се уникатни посетители, прегледи на страници, стапка на отскокнување и стапка на конверзија. Со анализа на овие мерни податоци, можеме да утврдиме што функционира и што треба да се промени за да се постигне конверзија.
Број на прегледи на страница: Прегледите на страницата мерат колку пати посетителот ја видел страницата на веб-локација. Секојпат кога страницата на нашата веб-локација се вчитува во прелистувачот се брои како преглед на една страница.
Просечно време поминато на страницата: Времето поминато на страница може да биде показател за тоа колку содржината е привлечна за посетителите. Подолгото време што посетителите го поминуваат на страницата сугерира дека страницата привлекува заинтересирани посетители што ги ценат информациите што ги наоѓаат на неа.
Стапка на отскокнување: Стапката на отскокнување е процентот на посетители што ја вчитуваат страница, а потоа ја напуштаат без интеракција или посета на која било друга страница на истата веб-дестинација.
